O alcalde da Guarda, Antonio Lomba e a concelleira de Deportes, Montserrat Magallanes, recibiron na Casa dos Alonso na mañá do mércores día 5 de abril ao deportista guardés Álex Sierpes, ao seu irmá e á súa nai para dar os parabéns á súa gran traxectoria deportiva.
Nun ambiente distendido, representantes do grupo de goberno interesáronse por como o carismático deportista local é capaz de compaxinar os seus estudos coa práctica deportiva, cun calendario de competicións e de adestramentos que lle deixa moi pouco tempo libre.
Sen dúbida, tanto Álex como o seu irmá, son dúas grandes persoas que, malia a súa curta idade, saben asumir o gran compromiso que representa as súas respectivas participacións en grandes competicións a nivel nacional e internacional, levando sempre o nome da Guarda alí onde van.
Para Montserrat Magallanes é fundamental ter un grupo de apoio constante que neste caso se representa na figura dos seus pais e no seu clube.
O rexedor valorou o esforzo que significa á súa idade, sacrificar moitas fins de semana ao ano para adestrar o competir, interesándose polos novos retos deportivos e por como afronta Álex o seu futuro máis próximo, desexándolle moitos éxitos.
Rematou esta recepción oficial coa entrega dun ramo de flores e un agasallo coa imaxe da fachada marítima da Guarda, confeccionado pola Asociación avelaíña.
