O concello da Guarda, a través da Concellería de Turismo, Festas e Festexos que xestiona Rafael Álvarez, vén de esixir unha “rectificación e aclaratoria” á La Voz de Galicia trala publicación dunha imaxe de tres persoas, da banda máis antigua da Festa do Monte da Guarda, facendo o ritual da xura anual, para ilustrar dita información sobre as medidas que os concellos tiñan implementado para loitar contra o “temido botellón”.
A información, de feito, sinalaba que A Guarda, era un dos concellos cunha normativa máis específica ao respecto, porén, utilizaba unha foto dunha celebración declarada de Interese Turístico como a Festa do Monte, para ilustrar a noticia algo que, evidentemente, “nada quen que ver co botellón do que se fala na información”, subliña o Concello guardés.
Dende a Concellería de Turismo, Festas e Festexos da Guarda, o concelleiro Rafael Álvarez sinala que “non entrando a valorar o contido do artigo, queremos manifestar o noso total desacordo coa desafortunada publicación da imaxe dunha festa declarada de Interese Turístico, como é a Festa do Monte relacionándoa co fenómeno do botellón”.
O enfado do Grupo de Goberno da Guarda é estensivo a “innumerables veciñas, veciños e achegados nestas festas que non entendemos a falta de rigor xornalístico”. Esa falta de rigor, insiste o comunidado do Concello da Guarda “pon de manifesto a desinformación sobre unha festa moi importante na nosa contorna, que se vén celebrando dende 1913 e que nada ten que ver co temido botellón”.
Por ese motivo, o Concello da Guarda solicita “encarecidamente unha inminente rectificación e aclaratoria ue disvincule totalmente esta imaxen da Festa do Monte co botellón, para non seguir danando a imaxe dunha festa que varias xeracións de guardeses e guardesas levamos no noso ADN”, conclúe o escrito de Rafael Álvarez.
