O vindeiro venres 24 febreiro A Guarda rendirá tributo unha vez mais á figura de Rosalía de Castro que celebra o seu día o 23 de febreiro de cada ano, por ser a data do seu nacemento. Neste ano 2023 os actos de celebración se centrarán nun recital a cargo do guardés Manuel Cadilla, “Maruxo” , así como a Exposición ao aire libre “Casa de Galicia”.
Recital de poesía
Manuel Cadilla “Maruxo” será este ano o protagonista do recital a Rosalía de Castro. Veciño da nosa localidade, mariñeiro retirado pero gran amante e coñecedor da obra e vida de Rosalía de Castro, ten participado habitualmente nas homenaxes e lembranzas á nai da nosa literatura, participando nos recitais, acompañando concertos, divulgando á figura rosaliana nos centros de ensino… Coa súa labor certamente foi gañándose un oco nas homenaxes á Rosalia e o cariño do público que demandaba a súa presenza e un novo recital no que sentir a forza e emoción que fan tan especial as súas intervencións.
Nesta ocasión o recital estará acompañado por música galega que irá a cargo de Iván Abal na zanfoña, Iván Gómez na gaita e Miguel Rodríguez na guitarra.
A cita será as 20:00 do venres 24 de febreiro no Centro Cultural.
Exposición “Casa de Galicia”
Dúas horas antes deste evento, as 18:00h. Na Praza do Reló, terá lugar a inauguración da exposición Casa de Galicia, que a través dunha montaxe pensada para permanecer a ceo aberto estará situada na céntrica praza ata o 12 de marzo. Esta exposición recolle con textos e imaxes a historia da Casa da Matanza, morada de Rosalía nos seus últimos anos e actual sede da Fundación e Casa-museo. Contaremos para a ocasión coa presenza do presidente da Fundación Rosalía de Castro Anxo Angueira
Caldo de Gloria
Por último un novo ano A Guarda súmase á conmemoración do Caldo de Gloria coa participación dos comedores escolares de primaria e restaurantes da localidade, que durante o día 23 contarán no seu xantar con manteis individuais co poema Miña casiña meu lar, no que se describe o xeito de facer un caldiño con poucos recursos.
Os restaurantes adheridos á iniciativa son: Arruaz, O Couto e Xantar.
