A Biblioteca Pública Municipal da Guarda convida este ano a celebrar o Día do Libro (23 de abril) dun xeito diferente e posto que debido ao confinamento non se poderán realizar actividades de xeito presencial, a Biblioteca guardesa quere darlle protagonismo aos libros en papel e á literatura. Así, a Concellería de Cultura e a Biblioteca Municipal, convidan a toda a veciñanza a celebrar o Día do Libro coa “vosa presencia virtual” ofrecendo cinco opcións diferentes para que participen todos os veciños e veciñas.
Como participar?
- Envía unha frase ou un verso breve, con indicación do autor e do título do libro, que traslade á cidadanía ilusión e forza nestes momentos de confinamento. Farase unha selección de 15 das propostas que serán despois rotuladas nas rúas e espazos públicos da localidade.
- Realiza un vídeo breve cun membro da familia lendo un libro aos máis pequenos e pequenas da casa. Especialmente, os avós e avoas que contan contos e non teñen o hábito de participar na redes sociais.
- Faite unha fotografía cunha selección de libros favoritos da túa biblioteca persoal.
- Fai unha autofoto co teu libro favorito, unha dedicatoria, unha cita breve.
- Realiza unha fotografía do teu recuncho favorito de lectura no teu fogar ou no exterior se tes algunha.
Envía a información nun correo a bibliotecamunicipaldaguarda@gmail.com coa proposta de participación que elixas xunto co teu nome, idade e localidade.
O prazo de participación remata o 30 de abril.
Todas as propostas recibidas serán publicadas na páxina Facebook da biblioteca coas etiquetas #QuedaNaCasa #DíaMundialDoLibro #BibliotecaMunicipalConcelloDaGuarda #ACulturaSegue
Día Mundial do Libro
O 23 de abril Día Mundial do Libro e do Dereito de Autor é unha celebración para promover o goce dos libros e da lectura.
Proclamada pola Conferencia Xeral da UNESCO en 1995, esta data simbólica da literatura universal coincide coa da desaparición dos escritores William Shakespeare, Miguel de Cervantes e Inca Garcilaso de la Vega. Este día rende homenaxe aos libros e aos autores e fomenta o acceso á lectura para o maior número posible de persoas.
Este ano dende a UNESCO difúndese esta mensaxe:
POR QUE A LECTURA É MÁIS IMPORTANTE AGORA QUE NUNCA? Máis que nunca, nun momento na que a maioría das escolas de todo o mundo están pechadas e debemos quedarnos na casa, podemos usar o poder da lectura para combater o illamento, estreitar os vínculos entre as persoas, expandir os nosos horizontes, á vez que estimulamos as nosas mentes e a nosa creatividade. Durante o mes de abril e durante todo o ano, é fundamental tomarse o tempo para ler só ou cos nenos. É un motivo para celebrar a importancia da lectura, fomentar o crecemento dos nenos e nenas como lectores e promover o amor á literatura. A través da lectura e a celebración do Día Mundial do Libro e do Dereito de Autor, o 23 de abril, podemos abrirnos aos demais a pesar da distancia, e viaxar grazas á imaxinación. Do 1 ao 23 de abril, a UNESCO compartirá citas, poemas e mensaxes para simbolizar o poder dos libros e fomentar a lectura. Ao compartir coñecementos, lecturas e libros facemos comunidade e podemos conectar a lectores de todo o mundo e axudar a paliar a soidade.
