A feira semanal de Vila Nova de Cerveira é, sen dúbida algunha, unha das feiras máis recoñecidas do norte de Portugal e Galicia e por iso, a Câmara Municipal de Cerveira quera manter unha “imaxe atractiva e aseada do espazo” e evitar que, logo de cada feira, a zona chea de lixo. A campaña ‘Feira Limpa, un xesto… unha actitude’ busca promover unha acción de sensibilización e apelar “ao bo sentido dos feirantes”.
O lanzamento desta campaña de sensibilización contou coa participación co vicepresidente da Câmara Municipal, Vitor Costa que, acompañado polos responsables da feira, contactou persoalmente con cada un dos 247 feirantes, explicando o escenario que queda despois de cada feira “en nada coincidente coa imaxe pública de Vila Nova de Cerveira a nivel estético e ambiental”, sinala o concello luso.
O folleto informativo distribuído amosa, a través de fotografías, o estado do recinto da feira antes e despois da celebración da feira, amais de relembrar as penalizacións que constan do Regulamento da Feira Semanal e que pasan a ter aplicación a partir do próximo sábado.
Está regulamentado, explica Vitor Costa, que, “antes de abandonar o recinto da feira, os feirantes teñen o deber de promover a limpeza dos espazos correspondentes dos lugares que lles teñan sido atribuídos”. “A falta de coidado por parte do feirante en canto á limpeza do espazo de instalación do seu posto, ben durante a feira ou ao remate da mesma, constitúe unha infracción sancionable con multa entre 50 € e 150 €, no caso de persoa física, ou de 125 € até ao máximo de 250 €, no caso de persoa colectiva”.
O executivo municipal procedeu á entrega de sacos para a recolla de lixo a cada un dos feirantes nunha iniciativa que foi ben acollida pola gran maioría, que asumiu o compromiso cívico de prestar máis atención e ter máis coidado coa limpeza do recinto, así como de seren transmisores da mensaxe.
Cómpre salientar que esta campaña de sensibilización promovida polo Concello de Vila Nova de Cerveira ten unha dobre función: a de contribuír a dar unha imaxe da Feira Semanal como un espazo limpo e aseado, respectado por todos; e lanzar un chamamento á separación de residuos, con evidentes ganancias ambientais.
