18.5 C
Pontevedra
Venres, 27 de Maio de 2022
Máis
    HomeColaboraciónsO Meu AndelFrancisco Castro, «Isto SI é un home»

    Francisco Castro, «Isto SI é un home»

    Francisco Castro ten unha longa traxectoria como narrador de ficción, tanto no eido da literatura infantil e xuvenil como no da dirixida a adultos, e pídovos que reteñades este dato na vosa memoria. Nesta ocasión vén de dar un pequeno xiro á súa andaina ao presentar o seu primeiro ensaio, encadrado dentro da colección «Feminismos», promovida pola Editorial Galaxia dende fai algúns anos. O seu título, «Isto SI é un home», xa é bastante clarificador, pero o subtítulo evita que nos poidamos perder en interpretacións equívocas: «Unha mirada masculina contra o patriarcado».

    Resulta unha obviedade dicir que existe unha amplísima variedade de ensaios nos que autores de distinta procedencia expoñen os seus estudos, experiencias ou pensamentos, atendendo a moi diferentes criterios, pero cando escoitamos esa palabra, «ensaio», os prexuízos herdados fan que tendamos a pensar en textos sisudos, farragosos e aburridos nos que ao lector común lle resulta doado perderse. Pois ben, e aquí é onde reclamo a retención do lector, quero lembrar que estamos diante dun autor cunha dilatada andaina como narrador de ficción, coñecedor dunha morea de recursos para facer da lectura algo ameno e dinámico. Pois ben: na redacción deste texto conflúen ao Francisco Castro profesor de Filosofía e feminista confeso e mailo Francisco Castro narrador, e o resultado é unha obra contundente e necesaria na súa exposición e amable na súa lectura.

    Pero prefiro determe na tese defendida polo autor ao longo das páxinas deste libro. Castro cuestiona sen tapuxos a idea de masculinidade que tradicionalmente se mantivo na nosa sociedade, a do «macho alfa» aguerrido e intolerante, forte e poderoso, dominante e equívocamente sexualizado, para defender a imperiosa necesidade de darlle a volta completamente. Tales falsos mitos, defende, non inducen máis que a moldear o noso comportamento natural na procura dunha idea errada de nós mesmos, co único obxectivo de manter as estruturas dun patriarcado arcaico, rancio e teimudo no sometemento da metade da poboación.

    Aceptar esa mitoloxía patriarcal e adoptar os seus postulados non pode arrastrarnos máis que á infelicidade polo ocultamento sistemático do noso propio «eu» fronte aos modelos impostos. Por iso reclama o dereito de todos aqueles que fomos educados seguindo tales criterios, a mudar a nosa concepción, a esixir que os valores defendidos polo patriarcado tradicional sexan trocados por novos valores, a buscar a nosa propia liberdade sen imposicións de ningunha caste e sen que iso signifique ser sinalados por ninguén.

    Cunha linguaxe tan coloquial coma contundente, o texto de Castro é un reclamo sobre a necesidade de desenvolvernos individualmente como persoas, de esquecer os hábitos herdados por unha sociedade patriarcal que necesita unha remuda urxente e a fondo. E faino partindo da experiencia propia ao utilizar a súa memoria persoal como fío condutor do relato, sobre todo na parte inicial, o que axuda a centrar a atención do lector. Xa dixen que os recursos narrativos son abondosos e forman parte indisoluble do texto para facer da lectura algo áxil e ameno.

    Francisco Castro

    Isto SI é un home

    Galaxia

    Colaboradores

    Alberto Aliaga Sola
    19 POSTS0 COMMENTS
    Bea Sanfa
    12 POSTS0 COMMENTS
    Manrique Fernández
    64 POSTS0 COMMENTS
    Paz de la Peña
    40 POSTS0 COMMENTS
    Ricardo Canosa Bastos
    14 POSTS0 COMMENTS
    Roberto Mera
    4 POSTS0 COMMENTS
    Avatar
    1 POSTS0 COMMENTS