11.4 C
Pontevedra
Martes, 27 de Febreiro de 2024
Máis

    Galicia

    Onte, 25 de xullo, celebrouse na nosa comunidade o día da patria galega, polo que esta publicación vai adicala a ela. Este día festéxase oficialmente dende 1979, ainda que a orixe desta celebración remóntase a 1919.

    Galicia, unha terra fermosa. Os que somos de aquí levamos a morriña no sangue, botámola tanto de menos cando estamos lonxe que, cando volvemos, sentimos que os pulmóns énchense doutro aire máis especial.

    E que me dicides da comida? O que se estraña un bo plato de pementos de padrón, tortilla de patacas, pulpo á feira ou raxo. Non hai cartos que o paguen! En Galicia somos de bo dente, para que negalo. Os que veñen de visita abofé que saen contentos cando se deleitan coa nosa gastronomía.

    Pode que chova e sempre necesitemos levar unha chaqueta por se refresca, pero iso non nos impide gozar e facer vida. Que un paseo pola praia en inverno tamén é fermoso, limpa a alma e devólveche esa calma que precisabas.

    Se non chovese, non teriamos esas fragas verdes e fermosas que esconden paraxes máxicas nas que podemos atopar castros, petróglifos, pozas,…, anacos de historia que nos ensinan o que ocorreu noutros tempos nesta terra de meigas.

    Que pensades das nosas praias? Se non fose porque a temperatura das augas non é a mesma,non teriamos nada que envexar as praias do Caribe e, se analizamos a parte positiva, a auga fresca é boísima para a circulación sanguínea.

    Todavía non tes claro o que é Galicia? Toma nota, amigo: Illas Cíes, Fragas do Eume, O Courel, Termas de Ourense, A Ribeira Sacra, Illas de Ons, Carnota, Santiago de Compostela, A Praia das Catedrais, Finisterre, Combarro, Monte de Santa Tegra, Sendeiro de Pedras Negras, Costa da Morte, Illa de Arousa, Pazo de Lourizán, Dunas de Corrubedo, Allariz, Mondoñedo, Baiona, … e moitos máis lugares fermosos que están agochados ó longo da nosa comunidade e que a fan tan especial.

    Feliz día de Galicia