Val Miñor

Nuria Gómez, actual Directora Deportiva do Club Baloncesto Nigrán é, dende esta pasada semana, a nova presidenta da entidade. Substitúe no cargo a Enrique Villar González que, despois de cinco anos, deixa a presidencia do club e o seu posto na Xunta Directiva. Villar foi un dos piares nos que, neste tempo, o C.B. Nigrán basou o seu crecemento e a xunta directiva lembra que "baixo a súa presidencia acadáronse importantes logros deportivos" amais de ser quen de "fortalecer de forma moi especial a faceta social da entidade".

O vindeiro luns, 15 de xuño, o Pavillón Municipal de Deportes de Baiona volverá a abrir as súas portas, pechadas pola crise sanitaria provocada pola COVID-19. A apertura, sempre pendente das circunstancias que dite a ‘nova normalidade’ estará marcada pola adopción de “estritas medidas de seguridade que permitan un funcionamento o máis normalizado posible e, ao mesmo tempo, unha total garantía de seguridade sanitaria para usuarios e usuarias”, sinala a concelleira de Deportes, Miriam Costas.

O Concello de Nigrán inaugurou este sábado 13 de xuño o seu primeiro banco contra a transfobia no marco da ‘Semana da Diversidade Sexual’ que organiza xunto a Sociedade Galega de Sexoloxía e a Asociación de Familias de Menores Trans Chrysallis. O mesmo está pintado cos colores da bandeira transxénero (rosa, azul e branco) e o lema ‘Non a Transfobia’, e está xa instalado na propia Praza do Concello, núcleo do centro urbano de Nigrán.

Durante todo o mes de xuño Prado Surf Escola, en colaboración coa Xunta de Galicia, pon en marcha unha actividade dentro do programa 'O Teu Xacobeo' para promocionar o Camiño de Santiago entre a poboación local do terceiro sector. A primeira destas actividades arrancou hoxe xoves 11 con Aldeas Infantís Redondela.

O Concello de Nigrán rematou as obras que permitirán achegar o abastecemento de auga a 947 persoas dos barrios de O Con, As Cartas, A Laxe, A Rúa, A Igrexa e A Carrasca, completándose así toda a Parroquia de Parada en menos de 4 anos. O Concello solicitou o 29 de abril a preceptiva autorización sanitaria á Xunta de Galicia para poder subministrar auga e agarda que o goberno autonómico lle dé a maior celeridade para que nos vindeiros días sexa efectiva

O candidato socialista á Presidencia da Xunta, Gonzalo Caballero, estivo hoxe en Baiona, onde apelou á mobilización de “todos os galegos” o vindeiro 12 de xullo. “Xogamos o futuro. Non servirá arrepentirnos catro anos se o PP de Feijóo segue, con recortes e reducindo as posibilidades de futuro de Galicia”, advertiu o líder dos socialistas galegos, quen chamou a “pasar páxina á etapa dos recortes de Feijóo”. “O cambio é máis necesario que nunca”, arengou.

O Concello de Nigrán ofrecerá este ano o programa ‘Música nas Parroquias’ para colaborar na celebración de todas as festas patronais do municipio, xa que este ano ou ben non se constituíron comisións organizadoras por mor da crise do Covid-19 ou estas tiveron totalmente limitada a posibilidade de recadar fondos. Deste xeito, o Concello investirá un total de 20.000 € con axuda do Plan Concellos 2020 da Deputación para que en cada unha das parroquias, coincidindo seu día grande, celebren o concerto dunha banda de música a mediodía (13:00 horas) tras a habitual procesión.

O Concello de Nigrán informa da interrupción do subministro de auga programado para mañá martes 9 de xuño entre 8:30 horas e 13:00 nas contornas de Lourido e A Ramallosa por mor da realización de traballos de mantemento e mellora da rede pública de abastecemento no cruce entre Francisca Lago e Torrente Ballester.

O Concello de Nigrán regalará a todos os nenos e maiores aos que lle celebrou o aniversario durante o confinamento un póster conmemorativo onde se reúnen nun mosaico todas as imaxes dos homenaxeados que autorizaron fotos e o debuxo dun corazón coroado co lema ‘Que a vida continúe achegando os corazóns’. O Concello tratará de levar durante este mes un a cada casa, pero estará tamén a disposición das familias na Oficina de Información Cidadá.

Este xoves 4 de xuño, o Museo da Carabela Pinta volverá a abrir as súas portas co que Baiona da un paso máis dentro da nova normalidade imposta pola crise sanitaria da COVID-19. A reapertura deste museo flotante engádese á da Casa da Navegación, hai xa semanas, co que a Concellería de Cultura do Concello de Baiona, que xestiona Miriam Costas, pon a disposición do público dous dos seus máis importantes elementos histórico-culturais.

O Concello de Nigrán ampliará de 50 a 70 a cantidade de negocios locais aos que custeará a licencia para poder formar parte da plataforma de comercio electrónico 'Dbarrio' co obxectivo de que se adhiran a esta app que ofrece envío a domicilio e, con elo, fortalecer ao pequeno comercio. Deste xeito, o Concello de Nigrán inviste finalmente 4.000 € nas licencias dando cabida a todos os establecementos que se anotaron, ademáis, tamén subvencionará a 2 transportistas para que ao consumidor final de Nigrán non se lle engadan gastos de envío ás compras realizadas no Val Miñor.

O presidente da Mancomunidade de Municipios do Val Miñor e alcalde de Baiona, Carlos Gomez, esixiu hoxe á administración sanitaria da Xunta de Galicia que o coñecido como reforzo de costas de sanidade “contemple os efectivos necesarios para dar cobertura á veciñanza dunha zona que, durante a época estival, triplica a súa poboación” e que este ano mantén as súas previsións “malia que centradas fundamentalmente no turismo interior e de proximidade”, sinalou Gómez.