Unha cocción a ceo aberto, como na época prehispánica se facía, pechou o venres o ‘IV Encontro Internacional de Cerámica’ organizado polo Concello de Nigrán e adicado nesta ocasión a México. Os dous grandes mestres oleiros Juana Gómez (Chiapas) e Tomás Esparza (Jalisco), impartiron durante toda a semana cadanseu obradoiro no CEE de Panxón xunto a Alejandro Camacho (Ciudad de México) e Miriam Salgado (Xochimilco), estes dous últimos expertos en técnicas de cartonaxe para a fabricación de ‘alebrijes’ e xoguetería tradicional. Estes catro reputados artesáns viñeron ex-profeso desde diferentes puntos do país azteca para este evento organizado polo Concello de Nigrán a través da Escola Municipal de Cerámica (a más antiga de Galicia con 40 anos de vida). Nas anteriores edicións foi adicado a Xapón, India e os países periféricos de España.
“Foi unha honra acoller en Nigrán a estes mestres mexicanos e que puidesen compartir os seus coñecementos coa nosa escola municipal, seguiremos apostando por estes intercambios culturais porque nos fan todavía mellores”, explica o alcalde, Juan González.
Así, durante esta semana, xaguares xigantes de barro, bruñidos cerámicos impresionantes, ou métodos de coccións a ceo aberto foron os protagonistas. “México mantén practicamente intacta unha cultura milenaria de gran riqueza que nos achega ao máis ancestral e primario do mundo da cerámica, por iso consideramos moi enriquecedor traer aos mellores mestres deste país”, explica Emilia Guimeráns, directora da Escola Municipal de Cerámica de Nigrán e quen contactou cos catro artistas invitados a través da Escuela Nacional de Cerámica de Guadalajara (México).