Por segunda vez, e pasados tres meses dende o relevo na alcaldía de Redondela, a Autoridade Portuaria de Vigo vén de remitir ao Concello redondelán a convocatoria para o Consello de Administración do Porto na que, como vogal e tamén por segunda vez, figura o exalcalde Javier Bas e non a actual alcaldesa, a socialista Digna Rivas. Este feito foi cualificado pola rexedora local como un intento de “ningunear” ao Concello de Redondela e a súa alcaldesa e de “falta de respecto sen precedentes” aos veciños e veciñas.
A alcaldesa de Redondela deu conta desta situación no decurso dunha rolda de prensa na que Digna Rivas expresaba “a súa máis absoluta indignación polo intento de silenciar a voz dos e das redondelás nunha reunión do Consello de Administración na que se van tratar temas que afectan directamente aos intereses de Redondela”.
Rivas lembrou que xa o pasado 26 de xullo, a convocatoria da reunión do Consello de Administración viña a nome do exalcalde, polo que se lle tentaba impedir a súa participación nos temas a tratar. Ao final, a alcaldesa de Redondela, conseguiu poder falar “pero impedíuseme o dereito ao voto que como representante de Redondela me correspondía”.
A partir de aí todo vólvese un tanto estraño, case que kafniano. Por partes dos técnicos do Concello de Redondela envíase novamente a documentación pertinente “a que sempre se enviou durante os anos anteriores” e que agora, curiosamente, parece non valer. Dende o Porto de Vigo comunícaselle ao Concello que a documentación ten que enviarse á Consellería do Mar “cousa que nunca se fillera e de feito, tal e como confirmaron os funcionarios do Concello, dende o 2015 os trámites se facían sempre igual e polo visto agora, non valen”, explica a rexedora local redondelá.
Envíase a documentación e por parte do Concello chámase á Autoridade Portuaria requirindo información sobre a tramitación da mesma “recibindo a calada por resposta”, sinala Digna Rivas.
Unha alternancia con Moaña que nunca se fixo
Digna Rivas explicaba tamén, no encontro coa prensa, a situación que no seo do Consello de Administración da Autoridade Portuaria teñen Redondela e Moaña. Ámbolos dous concellos teñen que repartirse o tempo de representación “algo que nunca se fixo durante estes oito anos, pese a que Moaña requiriu, máis dunha vez, o seu dereito a estar representada no órgano portuario”.
De acordo coa alcaldesa de Moaña, Leticia Santos, neste consello de Administración sería Redondela a que estivera presente “dada a importancia dos temas que se ían tratar no mesmo que afectan directamente ao noso municipio” explica Digna Rivas.
“A nosa sorpresa foi que o día 20 de setembro recibimos a Orde do Día do Consello de Administración e, novamente, ven a nome de Javier Bas” explica Digna Rivas que é clara ao sinalar que o que se pretende, con esta situación, “é deixar aos veciños e veciñas de Redondela sen voz no Consello cando se van tratar temas como a delimitación de espazos de usos portuarios e un informe verbal sobre o estado do antigo cargadero denominado Rande Duchess”
Digna Rivas non cree “nin nos erros nin nas coincidencias” e considera que a situación débese, única e exclusivamente, ao intento do Porto de Vigo de “impedir que a alcaldesa de Redondela poida defender os intereses dos seus veciños e veciñas, como é a sua obriga”. Por parte da Autoridade Portuaria e da Consellería do Mar, sinala Rivas “estáse a impedir que a voz da veciñanza de Redondela, expresada a través da súa alcaldesa, poida ser escoitada”.
De feito, lembra Digna Rivas, no anterior Consello de Administración “os informes técnicos presentados polos técnicos do Concello de Redondela sobre a zona de Rande, sorprenderon aos membros do Consello que descoñecían a realidade da situación”. Agora o que se pretende, conclúe a alcaldesa de Redondela “e que se saiba a realidade e que se poida escoitar a voz da veciñanza sobre a explanada de Duchess, o almacén de contedores e a desfeita que se quere facer na zona de Rande”.
