Esta fin de semana o programa “Bosques terapéuticos”, co que a Deputación de Pontevedra promove actividades baseadas na terapia oriental shinrin yoku (baño de bosque), chega á parroquia viguesa de Bembrive e a Pazos, en Silleda. Con todas as prazas esgotadas, o sábado 15 terá lugar unha ruta polo río Eifonso mentres que o domingo 16 o percorrido será pola paraxe da fervenza do Toxa. En cada unha delas 15 persoas desfrutarán dunha actividade na que se mesturan exercicio, cultura, historia e saúde, internándose na natureza co fin de relaxar a mente e reducir o nivel de tensión.
A Senda do Eifonso discorre por Bembrive, parroquia de Vigo, paralela ao río do mesmo nome, que nace no Monte das Lagoas e que se abre camiño entre o val, pasando aos pés da Capela de San Cibrán. O seu descenso vertixinoso converte as súas correntes en belas fervenzas, como a de Bouzafría, e dá orixe a varios muíños de auga nas súas dúas ribeiras, recibindo as augas dos seus dous afluentes, Mao e Pontecela. Esta ruta foi integrada no 2016 no Parque Botánico Arco da Vella.
Por outra banda, a ruta pola fervenza do Toxa, que transcorre pola parroquia de Pazos, en Silleda, amosa esta contorna de extraordinaria beleza na que vexetación, a rocha e a auga se funden para acadar unha obra mestra da natureza. Os 30 metros de caída do río Toxa esculpen a rocha de mil xeitos, un salto de auga que se completa cun denso bosque de carballos, castiñeiros, sobreiras e decenas de especies máis.
As dúas rutas, que comezarán ás 10.00 e durarán aproximadamente unha hora, parten dunha premisa fundamental: a conexión coa natureza. Ao longo deste mes de xullo realizaranse tamén camiñadas pola Illa de Tambo, a ruta da Pedra e da Auga, a ponte colgante do Lérez e outra máis pola fervenza do Toxa, se ben as prazas están xa todas esgotadas.
Apertura prazo de inscrición para os Bosques Terapéuticos de agosto
Quen queira desfrutar das saídas dos “Bosques Terapéuticos” aínda poderá facelo nas rutas previstas para o mes de agosto, para as que a inscrición abrirá este luns, 17 de xullo, a través do formulario recollido en www.depo.gal. Nese mes terán lugar os últimos percorridos da edición deste ano, que comezarán o día 5 pola Ruta da Pedra e da Auga e continuarán o 6 pola Illa de Tambo, o 12 polo Lago de Castiñeiras, o 13 na Carballeira de San Xusto, o 19 polo Río Eifonso e para finalizar, o domingo 20 de agosto, pola ponte colgante do Lérez.
