140 cativos de 30 concellos da provincia participarán desde este domingo 20 de agosto nos campamentos “Depo Aventura” da Deputación de Pontevedra na Lanzada (O Grove). Nesta novena quenda, cunha duración de seis días, a rapazada asistirá a múltiples actividades lúdicas e formativas para o seu enriquecemento persoal coas que tamén coñecerán lugares afastados da súa contorna habitual.
Nesta novena quenda de “Depo Aventura”, as 70 nenas e 70 nenos (todos nados entre os anos 2010 e 2015) proceden de Vigo (42), Pontevedra (19), Marín (6), A Guarda (6), Cangas (5), A Estrada (5), Tui (5), Vilanova de Arousa (4), A Illa de Arousa (4), Redondela (4), Mos (4), O Rosal (4), Lalín (4), Fornelos de Montes (3), O Porriño (3), Cambados (3), Baiona (3), Tomiño (2), Caldas de Reis (2), As Neves (2), Bueu (1), Moraña (1), Moaña (1), Cerdedo-Cotobade (1), Pazos de Borbén (1), Sanxenxo (1), Mondariz (1), Mondariz-Balneario (1), Ponteareas (1) e Soutomaior (1).
A Deputación ofrece á cativada un programa de actividades que, baixo o nome “A Lanzada, un paseo pola historia”, está destinado a favorecer a inclusión, a aprendizaxe da lingua inglesa, a igualdade de xénero, a arte, a cultura, a ciencia, o deporte, a lingua de signos, o respecto e o coñecemento da natureza e a dinamización e coñecemento da contorna. Ademais, os participantes escollerán a mascota oficial do programa (que se converterá na súa imaxe na próxima edición) e desfrutarán de excursións relacionadas coa natureza e o coidado do medio ambiente.
Nesta edición de “Depo Aventura”, que se desenvolve ata o 9 de setembro, participarán en total 1.540 menores de 58 concellos da provincia divididos en once quendas.