10.8 C
Pontevedra
Martes, 19 de Marzo de 2024
Máis
    HomeÉ NoticiaMáis de 200 persoas emprendedoras participaron na 'Webinar' co prestixioso divulgador económico...

    Máis de 200 persoas emprendedoras participaron na ‘Webinar’ co prestixioso divulgador económico José Mª O’Kean

    Carmela Silva destacou o valor do programa SmartPeme para achegar respostas nun momento de incertezas: “Non podemos esquecer que máis pronto que tarde haberá un día despois e teremos que reorientar o noso sistema produtivo”

    O catedrático de Economía e divulgador sevillano José María O´Kean foi o encargado de abrir as sesións “webinar” (seminarios online en formato vídeo) coas que o programa SmartPeme, da Deputación de Pontevedra, pon o seu grao de area para axudar á reactivación do emprendemento na nosa provincia unha vez que conclúa o estado de alarma. O´Kean, que ofreceu unha charla titulada “Covid-19: A crise inesperada. Implicacións económicas e expectativas de saída”, animou a aproveitar o período de hibernación para reinventar negocios e empresas no eido do comercio electrónico, buscando as “sensacións” no acto de consumo e apostando pola cooperación e non só pola competencia cos grandes xigantes mundiais do eCommerce.

    A webinar, na que participaron máis de 200 persoas emprendedoras adheridas a SmartPeme, comezou coa intervención da presidenta da Deputación, Carmela Silva, acompañada do deputado Gregorio Agís. Silva destacou que resulta evidente que estamos diante dunha crise que carrexa efectos moi negativos sobre o emprego e o noso sistema socioeconómico. Neste senso valorou o papel de SmartPeme como ferramenta útil para achegar respostas ás/os autónomos e ás PEME nun momento de incertezas. “Non podemos esquecer que máis pronto que tarde haberá un día despois e teremos que reorientar o noso sistema produtivo”. Silva concluíu que o mundo móvese cos optimistas, aos que cualificou como “o pulmón da saída”. “Necesitamos aos optimistas”, engadiu, “para avaliar a situación con realismo e poñer solucións enriba da mesa”. Por contra, destacou, os pesimistas “só quedan protestando e agardando a ver que sucede”. “Sairemos desta coas capacidades de todas e de todos”, concluíu Silva, nunha mensaxe de ánimo ao tecido empresarial pontevedrés.

    José María O`Kean fixo unha comparanza entre a crise financeira de 2008 e a actual crise sanitaria subliñando que, aínda que as orixes son moi distintas, corremos o risco de que os resultados sexan parecidos. O desenlace, explicou, vai depender moito das decisións que vaia adoptando a Unión Europea. Non obstante, o experto subliñou que xa está moi claro é que a desafección social pola globalización que xa se albiscaba antes do Covid19 vaise agudizar despois da pandemia.

    O´Kean centrou boa parte da súa intervención en animar ás/os emprendedores participantes a emprender o camiño da dixitalización nun escenario no que os “marketplaces” coméronlle gran parte do terreo ás tendas físicas. “Vivimos nun mundo hiperindividualista, no que o consumo faise cada vez máis dende a casa, aproveitando tódolos recursos que ofrece a web, e buscando sensacións, ademais de produtos”. Aconsellou aproveitar as oportunidades de financiamento barato para investir en loxística rápida, captar de xeito activo a consumidores e desenvolver ferramentas para responder e anticiparse ao que demandan. E, ademais, ser moi flexibles coas estratexias de venda, que agora pasan por ofertas personalizadas en función dos desexos, ofertas acumuladas ou produtos complementarios. “No pasado, continuou, as empresas estaban moi preocupadas polo “front office” (o que o consumidor ve) e consideraban o “back office” como algo interno. Agora xa non existe esa separación, e ademais hai que ir a polos clientes. É o momento de investir en recursos tecnolóxicos para ofrecer as sensacións que se demandan e en traballadores cualificados. Xa non se trata só de competir, senón tamén de colaborar porque a masa crítica importa“, concluíu.

    Finalmente, o relator abordou o reto macroeconómico que para España vai supor a caída do turismo, o sector que substituíu á construción como motor da economía trala crise de 2008. Na súa opinión, o turismo interior será a alternativa “porque non van chegar avións con 85 millóns de turistas ao ano”. Neste contexto debuxou a oportunidade que se abre para Galicia, que pode seducir cun modelo máis natural e saudable, lonxe das aglomeracións coas que asociamos o turismo de sol e praia do Sur e tamén aos saturados destinos urbanos.

    José María O´Kean, é doutor en Economía pola Universidade de Sevilla, Executive Master en E-Business polo Instituto de Empresa e catedrático de Economía da Universidade Pablo de Olavide de Sevilla desde 1997. É tamén profesor asociado de Entorno Económico e Análise de Países no IE Business School desde 1991.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.