28.4 C
Pontevedra
Luns, 22 de Xullo de 2024
Máis
    HomeÉ NoticiaCicloturismo e produto turístico industrial, eixos do ambicioso proxecto común dos concellos...

    Cicloturismo e produto turístico industrial, eixos do ambicioso proxecto común dos concellos do Xeodestino

    Crearanse as rutas de sendeirismo ‘Entre campos e viñedos’ e un produto de turismo industrial centrado na natureza, na auga, na terra e nas persoas

    Manter un territorio unido con grandes proxectos conxuntos. Esa é a máxima que alcaldesas, alcaldes, concelleiros e concelleiras decidiron novamente aplicar no Xeodestino Ría de Vigo e Baixo Miño, que comeza a perfilar as primeiras accións a levar a cabo ao abeiro do Plan de Sostibilidade Turística en Destino (PSTD) e no que volverán a apostar por iniciativas conxuntas que beneficien a todo o territorio.

    “Imos todas e todos da man buscando o desenvolvemento do noso territorio de forma conxunta e estamos a facelo coa posta en marcha de novos proxectos de futuro moi emocionantes. Primeiro foi o Xeodestino, logo acadamos o PSTD e agora é tempo de traballar noutro proxecto que marcará un antes e un despois para todas e todos nós”, salientou a presidenta da Asociación de Desenvolvemento Galicia Suroeste Eu Rural e alcaldesa de Tomiño, Sandra González.

    Nun encontro celebrado este mércores en Mos, as e os representantes dos 13 concellos implicados no PSTD (A Guarda, Baiona, Fornelos de Montes, Gondomar, Mos, Nigrán, O Porriño, O Rosal, Oia, Pazos de Borbén, Redondela, Tomiño e Tui) decidiron poñer en marcha dúas pioneiras accións conxuntas. Por unha banda, crearanse e homologaranse as rutas de sendeirismo en contornas enogastronómicas ‘Entre campos e viñedos’; por outra, avanzarase na posta en marcha dun produto de turismo industrial vinculado á gastronomía e centrado en catro temáticas: pedra, terra, auga e persoas.

    Como resaltou a representante institucional do Xeodestino e alcaldesa de Oia, Cristina Correa, “seguimos apostando polo desenvolvemento turístico conxunto. Por iso, nesta reunión decidimos non facer un reparto de fondos do PSTD por concellos, senón buscar como podemos utilizar o financiamento conxuntamente para establecer novos produtos que poñan o noso Xeodestino no mapa, un destino sostible, de calidade e que ofrece produtos diferenciais”.

    No marco do Plan de Recuperación, Transformación e Resiliencia financiado por fondos Next GenerationEU da Unión Europea, o Xeodestino Ría de Vigo e Baixo Miño obtivo un financiamento de 1,5 millóns de euros para o seu PSTD, ‘A despensa de Galicia’. O plan convértese así nunha oportunidade única para financiar actuacións transformadoras e de calado suficiente como para converter a Ría de Vigo e Baixo Miño nun destino sostible, innovador, competitivo e rendible co que atraer a un turismo de alto valor engadido ao tempo que se apoia á economía local e se aposta polo desenvolvemento do territorio, do patrimonio, da cultura, da profesionalidade do sector, da promoción e da dinamización conxunta.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.