12.5 C
Pontevedra
Domingo, 5 de Febreiro de 2023
Máis
    HomeÉ NoticiaAreeiro advirte do "elevado risco" de aparición do mildeu

    Areeiro advirte do “elevado risco” de aparición do mildeu

    A Estación Fitopatolóxica de Areeiro (EFA), centro dependente da Deputación de Pontevedra, informa no seu aviso fitosanitario semanal que á primeira mancha de mildeu detectada nunha parcela do Rosal o pasado martes, hai que sumarlle xa dúas máis en sendas parcelas do Salnés. Os técnicos da EFA indican que, aínda que no resto de fincas non se detectaron de momento síntomas desta enfermidade, espérase que aparezan nos próximos días.

    Esta previsión realízana atendendo á meteoroloxía pasada e á prevista para os vindeiros días con subida das temperaturas mínimas. Ante esta situación, o persoal técnico de Areeiro recomenda que naquelas viñas onde aínda non se aplicase ningún tratamento, se debe incrementar a vixilancia e revisar minuciosamente as plantas na procura da primeira mancha.

    No caso de que non se fagan revisións, a recomendación é a aplicación de tratamento para evitar problemas futuros. No caso de viñas nas que xa se aplicase un primeiro tratamento, insisten na necesidade de vixiar o estado das plantas, aínda que, en principio, non se espera que presenten síntomas. Desde a EFA tamén indican que como nestes primeiros tratamentos se están aplicando funxicidas sistémicos ou tamén penetrantes que soen ir acompañados cunha materia activa de contacto, para aproveitar ben a acción desa materia activa é necesario asegurarse de mollar ambas caras das follas.

    Segundo explican desde a EFA, desde a emisión do anterior aviso fitosanitario semanal, do 17 de abril, houbo unha variedade de condicións climáticas que incluíu, dunha banda, algunhas xornadas, como a pasada fin de semana, con temperaturas medias e máximas moi elevadas e ausencia de choivas e humidade foliar; e doutra, como case toda a semana, choivas máis ou menos intermitentes acompañadas dun descenso notorio nas temperaturas, especialmente as nocturnas, que se mantiveron na contorna dos 6-8 ºC. Aseguran que esta situación deu lugar, tamén, a un diferente nivel de risco de infección por mildeu segundo o período. Tamén indican que no momento de emisión deste aviso, as axencias meteorolóxicas consultadas non coinciden estritamente no seu prognóstico para os próximos días pois, aínda que todas falan dunha melloría na climatoloxía, algunhas aínda manteñen períodos con probabilidade de precipitación maior do 60% algún día.

    En canto á botrite, indican que en moitas zonas houbo diferentes episodios de sarabia e ventos fortes que produciu roturas de follas e gromos o que fará que, co transcurso do tempo desde que se producen esas lesións, vaian aparecendo tecidos necrosados sobre os que se pode instalar este fungo. Aseguran que nesta semana xa se observaron necroses nalgunhas fincas, pero non esperan que teñan incidencia debido a que a maioría das previsións meteorolóxicas apuntan para a próxima semana unha climatoloxía máis seca. En todo caso, explican que se se aplica un produto que leve folpet na intervención fronte ao mildieu, diminuirá aínda máis o risco de botrite.

    Á marxe da viña, o aviso fitosanitario tamén inclúe recomendacións salientables como renovar o tratamento fronte á lepra das árbores froiteiras de óso; renovar o tratamento fronte ao mildeu da pataca, sobre todo despois destes días de humidade e ante a previsión do incremento de temperaturas; e a aplicación de tratamento para o fungo ‘Phytophthora spp’ dos cítricos –só no caso de que a enfermidade estea confirmada–, e controlalo evitando acumulacións de auga na zona radicular e, se hai froitos afectados, retirándoos e eliminándoos.

    COLABORACIÓNS

    Antía Otero, «Barroco»

    É posible que todo viñese suxerido polo título do novo poemario de Antía Otero, «Barroco», pero ao mergullarme nas súas páxinas vivín a sensación de pasear por unha galería de arte na que cada un dos poemas era, en realidade, un cadro ou unha peza escultórica que a autora describía con detalle.

    Ponteareas e a filla pródiga: o novo espectáculo do Circo da Dereita

    Aínda que o pareza, non é un déjà vu, non. É real como a vida mesma. A dereita en Ponteareas regresa ao seu pasado, non sabemos se por convicción nostálxica ou, como parece máis evidente, por non atopar nada mellor que ofrecer. Se cadra, en realidade non hai tal regreso a un pasado que esa dereita nunca abandonou, por máis que durante os últimos anos algúns quixeran convencer a Ponteareas, pleno tras pleno e eleccións tras eleccións, de que aquel negro pasado nada tiña que ver con eles nin cun Partido Popular que, reescribindo a nosa historia política, tería nacido en 1998 coa chegada a Ponteareas dun Salvador chamado para redimir, como novo candidato popular, os imperdonabeis pecados orixinais da dereita ponteareán encarnada até ese momento por un alcalde orgulloso do seu pasado franquista.

    María Solar, «A culpa»

    A metade de camiño entre a novela negra e o thriller, María Solar vén de presentar un novo traballo para adultos no que pescuda nas interioridades da parte máis escura da alma humana a través dun trío de mulleres, protagonistas do relato.

    Antón Riveiro Coello, «Días de intemperie»

    A nova achega de Antón Riveiro Coello, «Días de imtemperie», é unha proposta que contén nove relatos de temática e transfondo diferentes, mais que teñen un elemento en común, como é a guerra no sentido máis amplo da palabra.

    Colaboradores

    Alberto Aliaga Sola
    20 POSTS0 COMMENTS
    Bea Sanfa
    14 POSTS0 COMMENTS
    Manrique Fernández
    78 POSTS0 COMMENTS
    Paz de la Peña
    41 POSTS0 COMMENTS
    Ricardo Canosa Bastos
    14 POSTS0 COMMENTS
    Roberto Mera
    6 POSTS0 COMMENTS
    Avatar
    1 POSTS0 COMMENTS