O Concello de Nigrán festexou esta semana o primeiro aniversario do seu horto urbano comunitario situado no parque Vázquez Grela (centro de Nigrán, lugar onde se celebrará) e o segundo aniversario do da Ramallosa. Ambos son municipais e funcionan baixo a coordinación da cooperativa local ‘SomosTerra’ (contratada tamén polo Concello para dirixir os cultivos nos centros escolares de Nigrán). Grazas a ambas iniciativas, actualmente medio cento de persoas das contornas máis urbanas de Nigrán cultivan e colleitan os seus propios froitos (quedan prazas dispoñibles para veciñanza que se queira sumar). O seu funcionamento é mediante o traballo en equipo e de xeito colaborativo con obradoiros semanais (as tardes dos mércores en Nigrán e os luns na Ramallosa).
“Queremos promover o autocultivo en contornas onde dificilmente a veciñanza dispón de terreo e, a través disto, fomentar hábitos saudables e potenciar a sensibilidade ambiental, a socialización e o espíritu colaborativo. Nos tempos que corren significa tamén un aforro nos petos dos usuarios e unha aposta pola sostibilidade”, explica o alcalde, Juan González.
“Son puntos de encontro no que, ademais, aprender sobre restauración e recuperación de solos, cultivo ecolóxico, asociacións de cultivos, compostaxe e sostibilidade… En Nigrán empezaremos de cero, delimitando e preparando entre todos o terreo; na Ramallosa foi diferente porque traballamos en grandes maceteiros con sustrato xa preparado”, explican Raquel Gómez e Diana Muñoz desde Somos Terra. En ambos o resultado é espectacular, tendo producido pementos, tomates, berenxenas, cabaciños, xudías, boniatos, amorodos, sandías… E actualmente sementando xa para os cultivos de outono, principalmente as coles.
O sistema deseñado para o Concello por Somos Terra implica que todos os usuarios realizan os traballos conxuntamente polo ben común, distribuíndose a posteriori a colleita de xeito equitativo entre todos. Para elo, establécese un calendario de tarefas que os inscritos deben seguir e semanalmente se realizan obradoiros específicos sobre determinados temas hortícolas (compostaxe, rego, especies aormáticas, hortos verticais…) ademais de contar con asesoramente presencial.
“A zona verde da Praza Carlos Casares da Ramallosa, que non se empregaba para nada e pasaba totalmente desapercibida, transformouse nun punto de encontro onde florecen os mellores valores e dos que como goberno nos sentimos máis orgullosos de promover. Esta mesma filosofía se aplicou ao parque Vázquez Grela de Nigrán, descoñecido para unha boa parte da veciñanza e que cada vez gaña máis usuarios”, explica o alcalde.
