7.6 C
Pontevedra
Venres, 29 de Marzo de 2024
Máis
    HomeVal MiñorGondomarA Rede Galega de Teatros e Auditorios da Xunta achega 13 funcións...

    A Rede Galega de Teatros e Auditorios da Xunta achega 13 funcións a Gondomar e Tui

    Os concellos pontevedreses de Tui e Gondomar presentaron hoxe as súas respectivas ofertas culturais para este outono, dentro das que programarán 13 funcións de teatro, danza e música cofinanciadas pola Xunta de Galicia a través da Rede Galega de Teatros e Auditorios. Tanto o Teatro Municipal de Tui como o Auditorio Lois Tobío de Gondomar son espazos asociados a este circuíto da Consellería de Cultura, Educación e Universidade, que durante o segundo semestre do ano ofrecerá 209 actuacións dun cento de formacións artísticas en 26 localidades.

    O escenario tudense será, así mesmo, a primeira parada da xira que o Centro Dramático Galego (CDG) emprenderá o 5 de novembro co seu espectáculo O charco de Ulises, dirixido por Marián Bañobre e Santiago Cortegoso. A compañía pública estreou esta produción o pasado mes de xaneiro na súa sede do Salón Teatro, en Santiago de Compostela, onde desenvolveu un primeiro período de exhibición, e regresa aos escenarios na recta final do ano para o seu percorrido por diferentes localidades galegas. 

    Ambas as presentacións contaron coa participación do director da Axencia Galega das Industrias Culturais (Agadic), Jacobo Sutil, quen incidiu na variedade e calidade da programación que se desenvolve no marco Rede Galega de Teatros e Auditorios, así como no seu importante papel á hora de dotar de continuidade e estabilidade no ámbito da distribución dos espectáculos producidos en Galicia.

    Programación do Teatro Municipal tudense

    No caso de Tui, o Teatro Municipal acolle nesta recta final do ano oito propostas dentro do circuíto autonómico. A súa oferta arranca con danza este mesmo venres día 1 de outubro, coa representación de Bailar agora, proposta coproducida por Marta Alonso Tejada e o Centro Coreográfico Galego, que foi ademais unha das montaxes gañadoras da última edición dos Premios de Teatro María Casares.

    Tamén en outubro, o espazo tudense programa os espectáculos Aibō de Compañía Eléctrica o día 8, O mel no caduca de Ibuprofeno Teatro o día 15 e O soño dos golfiños do grupo Golfiños o día 22. En novembro será a quenda de Paula Quintas coa súa peza de danza Nina Ninette o día 12, do concerto das Tanxugueiras o día 19 e de Teatro La Canica con Orfeo o día 26. Xa en decembro, o día 3 Camerata Lírica ofrecerá La Bohème en formato concerto escenificado.

    Cinco funcións no Auditorio Lois Tobío

    Tanto esta proposta lírica como Bailar agora poderán verse tamén no Auditorio Lois Tobío os días 13 e 20 de novembro, respectivamente. Son dúas das cinco citas que o escenario de Gondomar programa a través da Rede Galega de Teatros e Auditorios xunto con A lingua das bolboretas (9 de outubro), montaxe coa que Sarabela Teatro foi outra das compañías máis galardoadas este ano nos María Casares, Soga e cinsa de Aporía Escénica (6 de novembro) e Cartoóns de Producións Teatrais Excéntricas (21 de novembro).

    Con este segundo período de programación anual e pese aos adiamentos e suspensións polo peche sanitario de primeiros de ano, a Rede Galega de Teatros e Auditorios alcanzará en 2021 as 500 actuacións de teatro, danza, música, novo circo e maxia nas catro provincias. Para o seu desenvolvemento, conta cun orzamento anual de máis de 1,6 millóns de euros, que achegan a Xunta e as preto de 40 entidades locais asociadas e que reverte directamente na contratación das compañías escénicas e bandas musicais participantes, galegas na súa meirande parte.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.