A Deputación de Pontevedra realizou obras de reparación da pasarela de madeira da estrada de subida á parroquia de Baíña.
O Concelleiro de Infraestruturas do Concello de Baiona, José Ángel Bahamonde, achegouse ata o lugar para supervisar os traballos e recibir a obra de mellora. Bahamonde estivo acompañado polo Xefe de Servizo de Movilidad da Deputación de Pontevedra, Francisco Alonso González, e por outros dous técnicos da institución provincial.
A recuperación da pasarela de madeira situada na EP.2201_BAIONA – BAHÍÑA – FONTES, ao seu paso pola parroquia de Baíña, próxima á urbanización “Almirante Fontán”, levaba sendo necesaria desde hai un tempo.
Os arranxos consistiron no desmonte e substitución na súa totalidade, 104 metros de lonxitude, das vigas de madeira existente, desmonte e substitución por completo da tarima de madeira e reparación da estrutura metálica. En canto á estrutura metálica, as obras de mellora consistiron no reforzo, lixado e pintado na súa totalidade con pinturas específicas para ambiente salino.
Dada a situación de atraso nos traballos de arranxo dos danos, e dada a funcionalidade e características da estrada, o Alcalde de Baiona e Deputado Provincial, Jesús Vázquez Almuiña, púxose en contacto coa administración provincial para incidir na reparación da pasarela de madeira que levaba un importante tempo pendente. O persoal técnico do Servizo de Estradas da Deputación deu resposta á devandita solicitude poñendo en marcha unha actuación urxente de reparación, dado que é unha infraestrutura moi utilizada pola veciñanza de Baíña que se despraza a pé ao núcleo da Vila.
Desde hoxe con esta actuación recupérase o acceso de forma segura á urbanización “Almirante Fontán” e á parroquia de Baíña poñendo fin a uns danos nunha estrada moi utilizada pola veciñanza do lugar e que levaban tempo esperando dita reparación.
