16.1 C
Pontevedra
Sábado, 18 de Maio de 2024
Máis
    HomeVal MiñorBaionaA Arribada 2023 permitirá visitas online en directo

    A Arribada 2023 permitirá visitas online en directo

    O Concello de Baiona, a través da Concellería de Turismo, vai lanzar o vindeiro sábado 4 de marzo unha nova campaña de promoción turística dixital que incorpora como principal novidade circuítos virtuais en directo pola XXVII celebración da Arribada, Festa de Interese Turístico Internacional baionesa. Todo iso co fin de abrirse aos mercados internacionais que se consideran prioritarios polo volume de turistas que poden achegar a Baiona e o seu potencial de crecemento.

    Utilizando como principal ferramenta o márketing virtual en vivo con visitas virtuais en directo, con esta iniciativa preténdese atraer á Real Villa novos viaxeiros internacionais e tamén nacionais coa finalidade de que logo visiten presencialmente o destino.

    A inserción promocional de Baiona e da súa festa por excelencia “A Arribada” como destino turístico na plataforma dixital Heygo, coñecida como o “Twitch de viaxes”, ofrecerá dous circuítos ou viaxes virtuais en directo a cidadáns de todo o mundo. A audiencia adoita ser, maiormente, de EE.UU., Canadá, Reino Unido, Australia ou Nova Zelandia. Tamén de varios países europeos e mesmo de Xapón e China.

    Así, desde a plataforma (Heygo) ou a través da seguinte ligazón, todas aquelas persoas interesadas en coñecer de primeira man a Festa de Interese Turístico Internacional poderán conectarse de forma gratuíta en directo o vindeiro sábado 4 de marzo ás 19:30h desde a comodidade da súa casa a través dunha conexión a internet e gozar da emisión de parte da representación teatral, dos pasacalles e das diversas actividades que ofrece a nutrida programación da Arribada. O outro pase en directo será o domingo 5 de marzo coa visita en vivo á gran protagonista da celebración, a Carabela Pinta, para despois facer un percorrido polo mercado medieval: postos de artesanía e , sobre todo, gastronomía, para vender os nosos produtos locais máis aló das nosas fronteiras.

    Os circuítos virtuais teñen unha duración de 90 minutos aproximadamente. Durante o
    circuíto pódese interactuar en directo cos viaxeiros por un chat a tempo real. Eles
    escriben preguntas e o guía a pé de rúa pódeas ver na pantalla do móbil e contestar en directo, falando e interactuando co público.

    Á parte disto na app pódese sacar un “Postcard” (Postais/Fotos) de todo o que se está vendo en directo, é como sacar fotos co teu cámara coma se estiveses en persoa no destino ao que viaxas. Os viaxeiros virtuais poden gardar todas as súas fotos nun álbum de fotos como recordo do circuíto en vivo ao que asistisen.

    Centos de persoas virán ata Baaiona nunha viaxe virtual para coñecer máis sobre a historia da localidade e coñecer os seus grandes atractivos. Ademais brindarase a oportunidade de coñecer a recreación históricade Baiona en 1493.

    O Alcalde de Baiona, Carlos Gómez Prado, sinala que “estamos a falar de que chegaremos a todo o mundo e iso, evidentemente, significa que a Festa da Arribada nesta edición 2023 será aínda máis internacional, e que ademais vai ter unha repercusión importante para a marca turística Baiona , supoñendo unha xanela aberta ao mundo da nosa vila, o que traerá máis visitantes que queiran gozar de Baiona a pé de rúa”.

    Así mesmo, Gómez Prado destaca que “ Con esta campaña pretendemos promocionar Baiona no estranxeiro e fomentar a captación de turismo internacional que mostra un gran interese, ademais polo Camiño de Santiago, pola nosa paisaxe, a nosa gastronomía e as nosas tradicións. Este primeiro circuíto virtual, durante a Festa da Arribada, serve para poñer en valor todas elas e que sirva, ademais, para divulgar o feito histórico da chegada da Carabela Pinta a Baiona e a relación do noso municipio coa chegada a América en 1492 xa que é un feito descoñecido pola maior parte do turista internacional segundo datos da Oficina de Turismo”.

    Ademais, esta plataforma está dispoñible para todos os públicos polo que viaxeiros nacionais ou mesmo aqueles baioneses nostálxicos que non poidan vir a esta nova edición da Arribada poderán gozar en directo do ambiente festivo medieval da Vila Real.

    Estas dúas primeiras visitas virtuais en vivo englóbanse dentro da primeira acción do plan da campaña de márketing dixital desenvolvida pola Concellería de Turismo de Baiona, unha nova campaña de promoción turística que se abre a mercados internacionais considerados prioritarios polo volume de turistas que poden achegar a Baiona e o seu potencial de crecemento.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.