A alcaldesa de Redondela, Digna Rivas, xunto á concelleira de Ensino Olga García Ballesteros; o concelleiro de Medio Ambiente, Roberto Villar e unha técnica do departamento de Urbanismo, mantiveron unha xuntanza con responsables de Audasa a fin de tratar o cumprimento e remate dos puntos do convenio de expropiación forzosa do antigo Colexio Igrexa de Chapela.
Tal e como marca o documento aprobado polo Pleno do Concello de Redondela en Marzo do ano 2015, unha vez entregado o novo edificio e realizada a entrega de chaves do antigo por parte do Concello a concesionaria tomaría posesión das instalacións educativas. Unha empresa contratada por Audasa procede estes días a demolición do edificio principal do centro educativo expropiado tal e como marca o convenio aprobado pola corporación municipal.
O convenio recolle a demolición total das edificacións, incluídas as casas dos mestres anexas, e a ocupación total da parcela por parte da concesionaria da AP-9, actuacións que de momento non se van a realizar como estaba previsto xa que en reunións mantidas nos últimos meses con Audasa, a alcaldesa, o concelleiro de Medio Ambiente e a concelleira de Urbanismo, María Castro Abad demandaron que non se procedera a demolición das antigas vivendas dos mestres.
Nas reunións tratouse amais a solicitude de reversión de titularidade da parcela unha vez que Audasa e Fomento delimiten as zonas de dominio público que precisan reservar para o servizo da autoestrada. Nese sentido está previsto que ao longo dos vindeiros días técnicos municipais realicen unha valoración do estado das vivendas e a posibilidade de restauración das mesmas para uso público e evitar a demolición desta construción pola que pasaron moitas xeracións de nenas e nenos da parroquia.
Todos os pasos dados foron postos en coñecemento, polo míudo, da Asociación de Veciños de Chapela e da Asociación de Afectados da AP-9 en xuntanzas mantidas no concello , así como dos grupos da oposición que se interesaron neste tema.
Unha vez obtida a reversión, o Goberno local estudará e tratará coa veciñanza e grupos políticos diversas propostas para realizar un proxecto que contemple a creación dunha zona de esparexemento público e servizos para as entidades veciñais da parroquia tal e como ven demandado a veciñanza de Chapela nos últimos anos.
