7.6 C
Pontevedra
Venres, 29 de Marzo de 2024
Máis
    HomeComarcasRedondelaO Concello de Redondela denuncia o abandono, por parte da Xunta, das...

    O Concello de Redondela denuncia o abandono, por parte da Xunta, das obras da PO-250 iniciadas hai preto de dous meses

    Logo da visita de responsables da Xunta e membros do PP local ao inicio dos traballos, as obras están abandonadas e incrementan os riscos de seguridade neste viario de competencia autonómica

    “As obras que a Xunta de Galicia iniciou hai dous meses na PO-250 Redondela-Pazos, a parte de non resolver os graves problemas desta estrada, están, nestes momentos, no máis absoluto abandono”, afirmou hoxe a alcaldesa Digna Rivas. Hai dous meses, responsables da Xunta, “nun claro acto de falta de lealdade institucional”, engade a rexedora local, “acudían ao inicio das obras, acompañados por membros do PP de Redondela. Dous meses despois, as obras están sen rematar incrementando a inseguridade viaria da estrada”, engade a rexedora local.

    Dende o inicio dos traballos, para os que o Concello contaba cunha prometida reunión previa cos técnicos e responsables da Xunta, reunión que nunca tivo lugar, o Concello lembrou que, no seu momento, tiña advertido que co inicio das obras sen que se tiveran en conta as achegas realizadas polos técnicos municipais, “estaríase a desaproveitar unha extraordinaria oportunidade para solucionar, definitivamente, os graves problemas de seguridade viaria que ten esa estrada tanto para peóns como para vehículos”, apunta Digna Rivas. De feito, engade a alcaldesa de Redondela, “as achegas realizadas polos técnicos municipais facíanse dende a perspectiva de quen coñece perfectamente as necesidades dese treito de estrada incluída no casco urbano redondelán”.

    O Goberno local lamenta que a información que posúe o Concello sobre esa obra, sexa a que se conseguiu “a través de insistentes chamadas da Alcaldía a responsables de estradas da Xunta” e constatamos que “, lamentablemente, en ningún lado consta que se vaia a facer caso das recomendacións que trasladamos dende o Concello á Xunta”, asegura a concelleira de Urbanismo, María Castro

    Por se foran poucos os problemas de seguridade que presenta esa estrada e que foron recollidos nun informe técnico do Concello de maio do 2020, agora súmase o perigo que supón ter retranqueado o muro de contención situado nunha curva perigosa “sen que se dera continuidade ao nivelado e asfaltado da estrada nese punto, co que queda un desnivel perigoso para a circulación rodada”.

    Digna Rivas urxe á Xunta “a que solucionen o problema que eles mesmos orixinaron antes que se teña que lamentar algún accidente”. A alcaldesa lembra que “aínda é tempo de facer as cousas ben” polo que volven a insistir na necesidade dunha xuntanza con responsables de estradas da Xunta de Galicia “para trasladarlles, unha vez máis, as achegas do Concello que poñerían fin aos graves problemas de seguridade de que ten unha estrada que, diariamente, rexistra un gran tránsito tanto de vehículos coma de persoas”.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.