O Museo do Viño de Salvaterra presenta a súa oferta de cursos e experiencias para o 2020

O Museo do Viño de Salvaterra de Miño xunto ao Concello e a Confraría presentou a “ampla e variada” oferta de accións formativas para este ano 2020, un proxecto cualificado polos organizadores como “ambicioso e pioneiro tanto por número de accións coma polo contido das mesmas”.

A variedade das actividades presentadas van dende un Curso de Iniciación á Cultura do Viño, onde se busca que as persoas sen coñecementos previos e en moi pouco tempo, consigan entender moito mellor o viño e aprender a aprecialo, ata un curso sobre Os grandes clásicos: España, Francia, Italia e Portugal que permitirá as e aos participantes facer unha viaxe fantástica polas paisaxes, sabores e culturas destes países.

A oferta formativa completase con outras interesantes iniciativas como a denominada As 9 grandes. As variedades de uva que conquistan o mundo, variedades que calquera afeccionado ao viño escoitou algunha vez: cabernet sauvignon, chardonnay, shyarah.. Neste curso se darán a coñecer as súas características fundamentais, os diferentes estilos de viños que producen ao largo e ancho do planeta e aprenderemos a diferencialos e aprecialos.

A parte formativa péchase impartindo a Certificación WSET: Cualificación de Nivel 2 en viños. WSET é unha organización con sede en Londres e estendida por todo o mundo que conseguiu converterse na referencia internacional na formación do viño.

Dende en marzo do 2019 abriu as súas portas, “o Museo do Viño do Condado está sendo un referente en toda a comunidade”, asegura o Concello de Salvaterra de Miño e subliña o feito que “as máis de 3.000 persoas que nos visitaron nestes primeiros meses de andadura coinciden en destacar a gran calidade do Museo, pero sobre todo a súa interactividade”.

Dende o museo lévanse impartido diferentes charlas e cursos cun gran éxito de participación, ademais está sendo utilizado polo sector profesional como referente nas visitas nacionais e internacionais utilizándoo como unha ferramenta fundamental na promoción do noso sector vitivinícola.

“Nesta liña é na que se segue a traballar tanto dende o Concello coma dende a Confraría do Viño do Condado do Tea e Espumosos”, sinala o Concello de Salvaterra que considera que “é necesario que este museo sexa un museo vivo, que ademais da exposición fixa oferte aos usuarios outras opcións e alternativas vinculadas co propio sector, e é así como nace este programa de actividades para o ano 2020”.

Como parte novidosa dende a organización ofértanse nove experiencias en adegas baixo o lema “DA CEPA A COPA” que implicarán as adegas e aos profesionais na impartición de clases prácticas na produción e formación en espaldeira e outros sistemas, en enxertos, en mantemento do chan e laboreos, no manexo de vexetación e poda en verde, nas enfermidades e pragas da viña, no aclareo de acios e destetado e desfollado, no seguimento de maduración e toma de mostras, na vendima e elaboración de viños brancos e tintos e no seguimento das distintas elaboracións. Experiencias que rematarán cunha cata de viños das adegas visitadas.