O alumnado do CEP Carlos Casares de Alxén, en Salvaterra de Miño, vén de transformar, cos seus debuxos, un simple cartel anunciador dunhas obras nun marabilloso mural. A iniciativa xurdiu da alcadesa de Salvaterra, Marta Valcárcel, –membro do Consello Escolar– cando nunha das súas visitas ao centro propuxo transformar un cartel da Xunta de Galicia, onde se anunciaba o cambio de cuberta do colexio, nun mural feito con debuxos do alumnado.
Tanto o claustro como o alumnado acolleron a proposta con entusiamo e, mediante un concurso no que participaron todos os nenos e nenas do colexio, seleccionáronse as obras expostas no cartel –transformado xa en mural– que se atopa na valado de entrada ao recinto escolar.
Para Marta Valcárcel, “esta actividade conxunta amosa, unha vez máis, a boa sintonía existente entre o Concello e os centros educativos do municipio”. Un dos obxectivos que se traballan anualmente no centro é, concienciar ás novas xeracións, da importancia de coidar o medio ambiente, mediante a lei dos tres erres: reducir, reciclar e reutilizar.
Esta proposta, foi unha boa oportunidade para ensinarlle ao alumnado o valor da reutilización, algo tan importante de resaltar, tendo en conta que vivimos nunha sociedade consumista.
Concello e o CEP Carlos Casares cualificaron a iniciativa de “moi gratificante” nun ano tan difícil no que os nenos e nenas tiveron que manter os grupos burbulla, sen ter contacto directo cos demais compañeiros. Aos elixidos fíxolles moita ilusión ver os seus debuxos inmortalizados nun lugar privilexiado do colexio.
