Co obxectivo de facilitar a conciliación laboral e familiar a tenente de alcalde e concelleira de Ensino do Concello de Ponteareas, Cristina Fernández, informa da apertura do prazo para preinscribirse no Campus Tea Nadal 2019, unha alternativa de lecer para rapaces de 3 a 12 anos.
As preinscricións estarán abertas do día 5 ao 22 de novembro e as familias interesadas poden xa consultar as bases na páxina web do concello de Ponteareas ou directamente nesta ligazón.
Tamén se poden achegar ao departamento de Ensino do concello de Ponteareas para obter as bases e os anexos para cumprimentar de luns a venres de 9 h a 14 horas.
Do 23 de decembro ao 7 de xaneiro as familias disporán deste servizo de apoio que se desenvolverá no CEIP Nosa Señora dos Remedios de 9 h a 14 horas.
Cristina Fernández salienta a importancia de acompañar ás familias nos seus ritmos e atendendo as súas necesidades diarias para que poidan desenvolver plenamente a súa vida familiar e laboral, facendo de Ponteareas un fogar no que as persoas sempre conten.
A preinscrición deberá ser presentada antes do día 22 de novembro no rexistro xeral da casa do concello en días laborais a partir das 9 e ata as 13 horas.
A efectos de información e posibles reclamacións publicarase a listaxe provisional de admitido/as nos taboleiros do Concello de Ponteareas e na web do Concello, o día 27 de novembro.
