Logo de ter suspendida o pasado ano por mor do confinamento provocado pola pandemia da COVID-19, o CEIP Bouza Brey de Ponteareas recuperou unha das súas actividades tradicionais e das que máis gustan ao alumnado: a xornada de xogos tradicionais.
Certo é que o patrimonio cultural dun pobo va máis aló do que habitualmente enténdese como tal. Así, os xogos populares e tradicionais, forman parte da nosa propia identidade e que os máis pequenos, non só os coñezan, senón que gocen con eles, é a mellor forma de garantir a súa continuidade no tempo.
Con esa idea foi coa que o CEIP Bouza Brei de Ponteareas iniciou esa xornada dedicada precisamente a iso: a xogar e a traves do xogo, manter viva a tradición. Os xogos máis diversos adaptados ás idades das e dos participantes pero todos cun denominador común, as ganas de participar e o afán por divertirse e esquecer unha pandemia que formulou un novo panorama no que vivir.
A chave, a ferradura, e os birlos para o alumnado de sexto; petanca, zorregada e turra-soga para o de quinto. Os cursos de cuarto aprendían os segredos do calvo, tres en raia e a sementeira, mentres que os de terceiro contaban co arrastramortos e o limón.
Finalmente quedaban os aneis e a mariola para os alumnos e alumnas de segundo curso e os zancos e o cazo para o de primeiro.
Eles e elas serán os que, pasados os anos, terán que transmitir aos seus fillos e fillas –ao igual que a eles e elas transmitíronllo– estes xogos tradicionais, populares ou ‘de toda a vida’, que é unha desas frases que abrangue todo. Mentres eses xogos sigan vivos, a nosa cultura, tradicións, historia e esencia, seguirá viva.
Unha extraordinaria iniciativa do equipo docente do CEIP Fermín Bouza Brey, digna de ser copiada.
