A concellería de Seguridade Cidadá, que dirixe Vanesa Fernández, vén de dar conta da incorporación dun novo axente da Policía Local que pasará a engrosar o cadro de persoal da Policía local ponteareá. O novo axente iniciará agora a súa formación na Academia Galega de Seguridade. A responsable de seguridade cidadá adiantou que abrirase o prazo para cubrir duas prazas de mobilidade “de xeito que calquera Policía Local de outros concellos que queira vir desprazado para prestar os seus servizos en Ponteareas, pode solicitalo”.
A concelleira adianta tamén que no último ano ampliouse a oferta de emprego público ao convocar catro prazas máis para a Policía Local. Unha vez que a academia proceda a selección, pasarán unha fase de formación para logo incorporarse á plantilla de Ponteareas que, na actualidade, conta con trece axentes.
Vanesa Fernández explica que a ampliación da plantilla da Policía Local é un proceso lento que require moita previsión, “ao longo de moitos anos non se fixo unha planificación da plantilla da Policía Local nin se foi tendo en conta as posibles xubilacións polo que agora cando un policía se xubila temos que agardar máis dun ano para poder cubrir a plaza”.
