Alternativa Ciudadana de Ponteareas, a través do seu portavoz, Juan Carlos González Carrera, vén de demandar ao Goberno local que as instalacións do Colexio Virxe dos Remedios “sexan destinadas, de maneira provisional, a aparcamento gratuíto para vehículos” e lembra que, amais “de reunir condicións” xa foi utilizado en anos anteriores a este fin “en épocas puntuais”.
O portavoz dos independentes entende que no momento da desescalada no que se está que permite maior circulación da veciñanza, hay que adoptar “medidas urxentes” de cara a que “ás actividades comerciais e o propio mercado recuperen a normalidade”.
Cómpre salientar, explica González Carrera, que nas pasadas semanas debido ás consecuencias do COVD-19, e para garantir o distanciamento dos peóns, “tivéronse que tomar medidas excepcionais de anulación de ducias de prazas de aparcamentos”.
ACiP asegura que a hostalería e o comercio “precisan respostas inmediatas” e lamenta que o Goberno asegure que está a negociar novos aparcadoiros públicos “pero sen poñer data”.
A posta en marcha de maneira urxente das instalacións do colexio Virxe dos Remedios “paliaría unha situación que necesita solucións, e que axudaría a recuperar o movemento comercial no noso Concello” afirma González Carrera que, ao mesmo tempo, sinala que a medida “pódese por en marcha dun día para outro, pois os centros escolares atópanse pechados para a actividade escolar ata o próximo curso en setembro”.