‘Guía de itinerarios en bicicleta’ e ‘Monitor deportivo especializado en adestramento con soporte musical’ son as dúas accións formativas que o proxecto Tic Emprendes vai desenvolver no concello de Mondariz co obxectivo de axudar á inserción laboral das persoas mozas deste municipio. As especialidades foron elixidas despois dunha enquisa entre a poboación obxectivo desta iniciativa da Deputación de Pontevedra financiada polo Fondo Social Europeo.
As persoas participantes recibirán unha formación eminentemente práctica para mellorar a súa empregabilidade e animalos a dar o paso de incorporarse ao mercado laboral tanto por conta propia como allea. As accións formativas darán comezo a partires de outubro. Cada unha ten unha duración de 125 horas lectivas, das que 100 horas serán de formación específica da especialidade e 25 horas serán de contidos relacionados co autoemprego e a creación de empresas. As sesións desenvolveranse en xornadas de 5 horas diarias, polo que a duración total de cada un dos cursos será de 5 semanas. Ademais, as persoas participantes teñen dereito a unha bolsa de desprazamento de 13,45 euros diarios por día de asistencia.
As persoas interesadas en obter unha das 15 prazas dispoñibles en cada curso deberán ter entre 16 e 30 anos, estar inscritas no Sistema Nacional de Garantía Xuvenil, estar no desemprego, non estar integradas no sistema de educación ou formación regradas e residir nun dos 31 municipios do rural que participan nesta iniciativa (O Rosal, Oia, As Neves, Arbo, Crecente, A Cañiza, Covelo, Mondariz, Mondariz Balneario, Fornelos de Montes, A Lama, Pazos de Borbén, Ponte Caldelas, Cerdedo-Cotobade, Campolameiro, Moraña, Barro, Meaño, Meis, Portas, Illa de Arousa, Catoira, Valga, Cuntis, Pontecesures, Vila de Cruces, Rodeiro, A Golada e Dozón). O programa Tic Emprendes está dirixido a concellos de menos de 5.000 habitantes, ou municipios de menos de 10.000 habitantes que teñan saldo demográfico negativo nos últimos anos. Ten como obxectivo fundamental contribuír a fixar poboación no rural.
As dúas actividades profesionais elixidas en Mondariz están centradas en dous dos sectores produtivos máis relevantes da provincia como son as actividades de lecer ao aire libre e o deporte . No transcurso do curso de ‘Guía por itinerarios en bicicleta’ , as persoas participantes obterán, entre outros, os coñecementos básicos para o deseño e a realización das rutas, o mantemento e condución de bicicleta así como a organización de actividades grupais. A acción de formación e inserción laboral ‘Monitor deportivo en grupo con soporte musical’ está dirixida a adquisición de coñecementos para a realización de sesións deportivas ao ritmo da música. En ambas accións formativas se realizará un módulo de autoemprego e de emprendemento.
As solicitudes poderanse presentar ata 15 días antes do inicio dos cursos, preferentemente por medios electrónicos a través da sede electrónica da Deputación ou no rexistro do concello. Para mais información, as persoas interesadas poden contactar nesta ligazón e nos teléfonos: 886 217 320 / 986 804 100 extensión 47 321.
