José Manuel Gil Bernárdez e Belén Rodríguez Vidal, proclamáronse vencedores da terceira edición do «Trail Orixes de Mondariz» na cateogría Maratón de 46 quilómetros. Pola súa banda, Alex Sanmartín González e Aroa Sío Seijo facían o mesmo na categoría de 26 quilómetros pechando o cadro de honra, Antonio Groba Pérez e Vanesa Villar Dieguez na categoría MiniTrail de 14 quilómetros.
José Manuel Gil revalida o seu título un ano máis, pois tamén gañou o ano pasado na mesma distancia. Pola sua banda, Aroa Sio gañadora o ano pasado na distancia maratón, este ano pasábase a distancia Trail resultando tamén gañadora da proba.
En total foron 415 os participantes que tomaron a saída nesta proba entre as tres distancias, o que amosa claramente o crecemento que, ano tras ano, experimenta esta proba, feito destacado pola organización que sinalaba que foi preciso “aumentar as prazas para a distancia de MiniTrail dado que, de non facelo, moitos corredores e corredoras quedarianse sen participar”.
A Asociación Deportiva Mondariz, organizadora da proba, expresaba a súa satisfacción polo resultado desta cita deportiva “despois de moitos meses de traballo e organización” e quixeron agradecer a presenza “de todos os e as participantes que se achegaron a Mondariz para participar nas diferentes distancias, a pesares das condicións meteorolóxicas”.
A maioría dos participantes destacaron a singularidade dos percorridos onde había treitos moi técnicos e outros máis doados, facendo deste trail unha proba única e consolidada no calendario trail de Galicia.
Dende a organización destacaron que, se ben sen os corredores non sería posible esta proba, tampouco o sería “sen os voluntarios e voluntarias que estiveron todo o día dando apoio os corredores dende os diferentes avituallamentos así como en diversas partes do recorrido e na meta e saída. Un gran equipo humano que fixo posible que non se producisen incidencias no III Trail Orixes”
O agradecemento o facía a AD Mondariz tamén “aos colaboradores e patrocinadores que nos axudaron a que os participantes vivisen unha gran experiencia neste trail e desexen volver para o ano.”
Rematado III Trail Orixes “xa nos poñemos en marcha para que o IV Trail Orixes sexa unha realidade no 2020 e para que siga sendo un atractivo para corredores”, conclúe a organización.
