A delegada territorial da Xunta de Galicia en Vigo, Ana Ortiz, animou este luns ao alumnado do obradoiro Rehabilita Salceda a aproveitar a oferta formativa e laboral para incrementar as posibilidades de atopar un traballo. Así o trasladou a representante autonómica tras confirmar que o Goberno galego financiará con 531.000 euros outro taller de emprego no municipio.
“Contades agora cunha ventá ao mercado de traballo e tanto Salceda como o resto da área de Vigo e de Galicia, a sociedade e as empresas, necesitan xente formada, aí é onde tedes a vosa oportunidade”, destacou.
Ana Ortiz salientou a implicación da administración autonómica coa promoción do emprego na área de Vigo. O obradoiro Rehabilita Salceda, organizado polo Concello de Salceda de Caselas, contou cunha subvención de 503.987 euros por parte da Xunta para ofertar as especialidades de Albanelería e Op. Auxiliares.
Ademais, a delegada territorial confirmou que xa está aprobada outra achega de 531.046,20 euros para o curso Reformas e Melloras de Centros Formativos e Cívicos 2023, concedidos a través do Concello de Salceda, que permitirá que 10 personas sen emprego melloren a súa cualificación en carpintería de madera.
A representante autonómica enfatizou o compromiso do Executivo galego por incrementar as oportunidades e a estabilidade laboral dos galegos e galegas, cunha formación adaptada ás demandas reais do mercado e en colaboración cos concellos. Fixo así especial fincapé na ampla dimensión destes programas, por canto melloran a empregabilidade dos participantes ofrecéndolles unha formación para o emprego teórica e práctica de calidade, con opción a obter un certificado de profesionalidade e a un contrato de traballo.