A dirección local do BNG do Porriño anunciou que vai favorecer un acordo de esquerdas “pero non comparte que nas negociacións mantidas entre os grupos se antepoñan intereses partidistas nin que se esixan salarios e cargos de confianza”. A situación actual, aseguran os nacionalistas “esixe amplitude de miras para poñer por diante o interese xeral e a calidade de vida das persoas, que para nós é o prioritario”.
Avanzar no modelo de vila pola que aposta o BNG é a formación asegura ter dado o paso de formar parte do goberno en coalición co PSOE, “a pesar das diferenzas que nos separan” porque, afirman “as solucións para O Porriño nunca van vir da man dunha dereita que coñecemos de sobra e que xa paralizou cunha moción de censura o cambio iniciado polo Bloque no período 2003-2010”.
O BNG ten proxectos importantes en marcha e asegura estar sempre aberto “a acordar en positivo” novas iniciativas en beneficio do Porriño. Porén lamentan que nas negociacións mantidas entre os distintos grupos “están a primar os intereses de parte antes que o interese xeral. A dereita pódese fortalecer no Porriño grazas a este irresponsábel comportamento”.
“Nós non compartimos esa forma de facer política. O electorado de esquerdas confía en que se poida artellar unha alternativa críbel ao PP fóra de personalismos”, afirmou a responsábel local do BNG, Míriam Martínez.
No Bloque entende que agora “é o momento de acordar a investidura, negociar a persoa que ocupe a Alcaldía e as liñas básicas do futuro goberno”. Despois, engade a responsable nacionalista “haberá que decidir as distintas áreas de xestión e as súas retribucións, dentro da negociación dun novo orzamento”.
“Debemos buscar unha candidata ou candidato de consenso para reconducir unha situación que pode hipotecar o futuro do Porriño. A proposta do PSOE non conta a día de hoxe cos apoios necesarios. Desde o BNG emprazamos ao grupo socialista a buscar unha opción que garanta a investidura e impida a entrada do PP. Estamos en disposición, de ser necesario, de ofrecer o noso candidato para desencallar a situación. Nós non pomos vetos pero temos a certeza de que Pedro Pereira sería a mellor opción para dirixir o Concello”, concluíu Miriam Martínez.
