EU Son do Porriño advirte que non teñen que xustificarse ante o PP “porque nin somos goberno nin temos que renderlle contas aos Populares”

EU Son do Porriño saiu onte ao paso, de xeito claro e contundente, ás declaracións realizadas en días anteriores polo PP porriñés na que adiantaba a súa postura de solicitar a comparecencia da alcaldesa Eva García de la Torre e da voceira de EU Son, Patricia Sío, pola polémica xurdida sobre a suposta decisión da alcaldesa de dimitir.

En cinco puntos, a formación asemblearia da resposta aos populares, puntos que pola súa importancia e por deixar ben clara a postura de EU Son do Porriño, transcribimos literalmente.

Sinalan, en primeiro lugar que “Nós respondemos e responderemos sempre ante a cidadanía do Porriño, no Pleno e nas rúas. Ante quen non temos que xustificarnos é ante o PP porque nin somos goberno nin temos que renderlle contas aos populares. As nosas decisións son tomadas sempre en asembleas ou no Consello Local e as reunións con terceiros sempre as mantemos mínimo dúas persoas do grupo.

O aparecido nalgún medio é, ademáis de falto de rigor informativo ao non ter contactado con todas as partes, unha ofensa á honra e unha acusación grave de “chantaxe”. Este ataque ridículo desenmascara a quen o lanza e pensa que somos todos iguais. Ollo de seguir con ese tipo de afirmacións, non nos obriguen a ter que tomar unha vía que non desexamos.

Se nalgún momento quen representa a este grupo municipal quixese algún sillón ou cargo e ese fose o propósito da nosa acción política, xa teriamos dúas concellerías e en mellores condicións que agora. Só chegaba con negocialas antes da sesión de investidura.

A noticia da dimisión da alcaldesa partiu do xefe de gabinete cando as nosas concelleiras lle transmitiron que calquera negociación importante pasaba por aí. Non é que o noso Grupo Municipal fose a votar a favor no expediente das facturas da 413 que ía a Pleno, senón que valorariamos cales estaban ben informadas e cales non podiamos aprobar.

O PP debería facer política doutro xeito e cambiar de estratexia comunicativa; quen o asesora ou lle fai as notas de prensa está acabando cunha imaxe que tiña Alejandro de conciliador e moderado e resultando últimamente moi resesa”.