Con tan só oito anos de idade, a mosense Maia Pérez Souxa forma parte xa da selectiva lista –con menos de dez nomes– de galegos e galegas que foron Campións de España de Xadrez. A xadrecista do Club Xadrez Mos, que acadaba este título o domingo 23 de xuño, foi recibida hoxe pola alcaldesa de Mos Nidia Arévalo á que acompañaban o seu adestrador e tesoureiro do Club Xadrez Mos, Brais Otero Nogueira; o seu pai e secretario do Club Xadrez Mos, César Pérez Novás e a concelleira de Deportes, Begoña Toucedo.
Aos seus 8 anos de idade, a nova promesa do Xadrez Mos, Maia Pérez Sousa, proclamouse Campioa de España de Xadrez na Categoría Sub-8 no torneo celebrado na localidade granadina de Salobreña, onde se deron cita un total de 99 xogadoras e xogadores, os talentos máis novos do xadrez español. O torneo deu comezo o xoves día 20 e finalizou o domingo 23 de xuño. Catro días de competición durante os que todos os participantes disputaron un total de 9 roldas.
![](https://comarcasnarede.com/wp-content/uploads/2019/07/MaiaPerez_campioa_xadrez03.jpg)
A pesar de non ter un comezo de competición ideal, perdendo as dúas primeiras partidas, Maia conseguiu sobrepoñerse e alcanzar un total de 6.5 puntos dos 9 posibles que a proclamaron Campioa en Categoría Feminina, e 11º Clasificada na Xeral. Unha actuación brillante na súa primeira participación a nivel Nacional, que pon peche a unha gran tempada para Maia, que finalizara ademais 4ª no Campionato Autonómico, logrando unha bolsa da Federación Galega para participar no Campionato de España, do que finalmente se proclamou Campioa.
![](https://comarcasnarede.com/wp-content/uploads/2019/07/MaiaPerez_campioa_xadrez07.jpg)
Este gran resultado permite a Maia representar á delegación española no Campionato de Europa de Xadrez en Categoría Sub-8, que se celebrará as dúas primeiras semanas do vindeiro mes de agosto en Bratislava, Eslovaquia.
Dende o seu equipo, o Club Xadrez Mos, subliñaba o orgullo que supón para o Club “a achega de Maia á historia do xadrez galego, sendo menos de 10 os Campións de España históricos pertencentes á nosa comunidade”. O club aseguraba que este merecido resultado era “froito do esforzo e entrega de Maia, e do labor que está a realizar o Club Xadrez Mos en colaboración co Concello de Mos. Apostando polo xadrez nas escolas, pola difusión entre os máis novos, fundamental para arraigar a paixón do xadrez no noso Concello, e para poder descubrir e potenciar talentos como o de Maia”.