O bar restaurante O Cruceiro, na parroquia de Louredo, en Mos, foi escenario da presentación das XVI Xornadas Micolóxicas e Forestais do Concello de Mos, unha actividade que se iniciará o domingo 17 de novembro ás 12 horas na contorna do Pazo de Mos e, dende ese momento e durante todo o mes de novembro, nos restaurantes do municipio.
A presentación comezou ás 20.30 horas do mércoes, 6 de novembro, e contou coa asistencia da alcaldesa de Mos, Nidia Arévalo; o concelleiro de Medio Ambiente, Leo Costas; a experta micóloga Puri Lorenzo e representantes da Comunidade de Montes de Mos e da Fundación Pazo de Mos.
Tamén estiveron presentes, nesta presentación, representantes dos cinco restaurantes mosenses participantes nas Xornadas Micolóxicas 2019 que ofreceron unha degustación dos pratos que van a servir na Gran Degustación de Cogomelos que se celebrará no contorno do Pazo de Mos o domingo 17 de novembro ás 12.00 horas e, a partir desa data e ao longo do resto do mes de novembro, nos propios restaurantes.
[su_image_carousel source=”media: 8513,8514,8515″ crop=”5:4″ link=”lightbox” autoplay=”0″]
Ditos pratos son por parte de Adega da Tía Carmen croquetas de setas con castañas e empanada de trigo con setas e castañas; por parte do anfitrión, O Cruceiro, setas salteadas con coello e fabas, tarta de queixo con sirope de setas e pudin de setas con froitas do bosque; por parte do Bar Restaurante Curuxeira fajitas recheas de setas e polo e tortilla de xamón e setas; por parte da Casiña da Tía Albina, filloas de champiñóns con gambas; e por parte da Tapería A Cova da Santa, pizza mar e monte: salmón afumado con variado de setas. Esta degustación estivo maridada con viños xentileza de Disgobe, que patrocina estas Xornadas.
As Xornadas son posibles grazas á colaboración de Concello e Comunidade de Montes de Mos, que as organizan conxuntamente, a participación e implicación dos hosteleiros; e a subvención da Xunta de Galicia.
A Gran Degustación do domingo 17 de novembro no contorno do Pazo de Mos estará complementada co IV micomercado (mercado micolóxico). A xornada gastronómica prolongarase dende as 12 horas ata as 15 horas. De 11 horas a 14 horas e de 17 horas a 20 horas estará aberta ao público no Pazo de Mos unha exposición e consulta sobre cogomelos. E ás 12:30 horas haberá unha actuación do Grupo de Baile e Gaitas Ruada de Torroso. Xa pola tarde, ás 18 horas, actuará o grupo Animar-T Animación que realizará o espectáculo de contacontos, A Casiña de Cartón.
Como cada ano nas Xornadas Micolóxicas de Mos, regresan as charlas e conferencias didácticas sobre micoloxía. Serán todas ás 20.30 horas no Pazo de Mos. O luns 11 de novembro Xosé Braulio Mondragón Abuín falará sobre o uso das nosas mediciñais (estudio sobre a flora forestal). O martes 12 de novembro Francisco Alonso Toucido, de Estela Arqueoloxía e Patrimonio, dará a conferencia titulada ‘Patrimonio e monte, oportunidades e xestión’. O mércores 13 Puri Lorenzo, bióloga especialista en micoloxía do Grupo Micolóxico Galego, ofrecerá a ponencia ‘Cogomelos tóxicos e intoxicacións’. O xoves 14 Hugo Fernández Rincón, falará sobre as Cantarelas e Trompetas nos montes galegos. E o venres 15 de novembro José Luis Tomé, da Federación Galega de Micoloxía, ofrecerá a charla ‘Cociñando cogomelos’.
Por último o sábado 16 de novembro de 10.00 horas a 13.30 horas realizarase a tradicional saída para a recollida e identificación de cogomelos guiada por dous monitores especializados. Para participar é necesaria inscrición previa no Pazo de Mos durante os días que se imparten as charlas sobre micoloxía. As prazas dispoñibles son limitadas.