A alcaldesa de Mos, Nidia Arévalo, presidiu hoxe a Mesa local contra a violencia de xénero na que se adoptaron dous importantes acordos: a inclusión do Concello de Mos no sistema VioGén e a proposta de creación dunha mesa de traballo para a redacción dun protocolo coordinado entre os organismos públicos municipais para a detección, seguimento e intervención de casos de violencia de xénero.
Nidia Arévalo estivo acompañada polo concelleiro de Igualdade, Leo Costas; a concelleira de Política Social, Sara Cebreiro e a concelleira de Educación Julia Loureiro. Amais dos representantes do Goberno local, na Mesa atopábanse tamén o xefe territorial da consellería de Emprego e Igualdade, José Antonio Rodríguez; a xefa da Unidade contra a violencia sobre a muller da Subdelegación do Goberno, Manuela Vilaboy; persoal técnico de Servizos Sociais do Concello, persoal do CIM, persoal do Servizo de Atención Temperá, Policía Local, Garda Civil, Emerxencias do Concello de Mos, Traballador Social do Centro de Saúde, Direccións do IES de Mos, CEIP de Petelos, e CEIP Pena de Francia; a Directora do Centro de Emerxencias, Elena Molanes e unha representante da EMUME (Equipo de Mulleres e Menores) da Comandancia da Garda Civil de Pontevedra, Belén de la Morena.
O Sistema de Seguimento Integral nos casos de Violencia de Xénero (Sistema VioGén), da Secretaría de Estado de Seguridade do Ministerio do Interior, púxose en funcionamento conforme á Lei Orgánica “de Medidas de Protección Integral contra a Violencia de Xénero”, sendo os seus obxectivos: aglutinar ás diferentes institucións públicas que teñen competencias en materia de violencia de xénero, integrar toda a información de interese que se estime necesaria, facer predición do risco e, atendendo ao nivel de risco, realizar seguimento e protección ás vítimas en todo o territorio nacional, e efectuar un labor preventivo, emitindo avisos, alertas e alarmas, a través do “Subsistema de Notificacións Automatizadas”, cando se detecte algunha incidencia ou acontecemento que poida poñer en perigo a integridade da vítima. Buscando, finalmente, establecer unha tupida rede que permita o seguimento e protección de forma rápida, integral e efectiva das mulleres maltratadas, e dos seus fillos e fillas, en calquera parte do territorio nacional.
A Mesa local contra a violencia de xénero serviu tamén de foro para presentar a programación organizada polo Concello de Mos para conmemorar o vindeiro 25N. O CIM de Mos, con motivo do 25 de novembro, Día Internacional da eliminación da Violencia contra a muller, organiza este ano 2023, no que os casos no que vai de ano xa superan os casos de violencia do ano pasado, sendo una realidade durísima que nos ten que facer reflexionar sobre a importancia na prevención e sensibilización da sociedade contra a violencia machista, unhas accións e actividades neste eido dirixidas especialmente á xuventude e á poboación xeral. As iniciativas organizadas son, para o 21 de novembro, unha chala informativa sobre agresións sexuais e violencia sexual no IES de Mos, concedida pola Secretaría Xeral de Igualdade. O 24 de novembro, ás 11:00h, acto de homenaxe e minuto de silencio en recordo das vítimas de violencia, en Puxeiros. 29 de novembro, charla a cargo de Noelia Míguez para o alumnado do IES. O 1 de decembro, charla para familias de María Couso, Licenciada en Pedagoxía e fundadora de PlayFunLearning, ás 18:30h. E ademais no mes de decembro realizaranse obradoiros nos centros educativos.
