Tomiño quenta motores para celebrar a sétima edición da xa tradicional Semana da Educación, que este ano volve a formato presencial. Baixo o lema ‘TransFORMANDO a sociedade, educando na diversidade’, o auditorio de Goián acollerá do 7 ao 10 de febreiro (19.00 h) estas xornadas dirixidas tanto a persoal docente e educador como a pais e nais que procuren formarse en diferentes aspectos relacionados co mundo da educación. “Cremos na educación como ferramenta firme para conseguir transformar a nosa sociedade”, salienta a alcaldesa, Sandra González, quen convida á veciñanza e ás e aos profesionais da educación a asistir a este evento totalmente gratuíto.
Como en cada edición, catro personalidades de relevancia en distintos ámbitos achegaranse ata Tomiño para poñer enriba da mesa diferentes aspectos relacionados coa tarefa de educar. O encargado de inaugurar as xornadas este luns 7 de febreiro ás 19.00 h será José Antonio Fernández Bravo, que falará sobre ‘Ensinar dende o cerebro de quen aprende’. Doutor en Ciencias da Educación, docente, escritor e investigador sobre educación e aprendizaxe da matemática, este experto reflexionará sobre a importancia de desatar ligaduras e superar costumes de dubidoso acerto na ensinanza e de ensinar como os nenos e nenas aprenden porque “como é posible a atención á diversidade sen unha diversidade de atención?”.
O relatorio do martes 8 de febreiro (19.00 h) será a cargo de Maitane Alonso Monasterio, investigadora, co-fundadora de Innovating Alimentary Machines, estudante de medicina e membro do Ranking dos 120 Future Leaders iberoamericanos de LlyC. Con moitos premios ás súas costas, Alonso Monasterio abordará a importancia de pasar da curiosidade á realidade pasando pola educación. Na súa charla ‘1+1≠2’ tratará de responder a que facer cando temos una idea que consideramos que pode ter potencial para crear un impacto positivo na sociedade.
A xornada do mércores 9 de febreiro (19.00 h) estará protagonizada pola doutora en matemática pola Universidade de Sevilla Clara Grima e a súa conferencia ‘Na procura do grafo perdido’. Con numerosos premios e recoñecementos Grima presentará ao público un grafo, un debuxo simple realizado a partir de puntos e raias que, se se observa con cariño a paciencia, desvela un obxecto matemático fascinante cunha chea de aplicacións sorprendentes que serven para analizar as redes sociais, deseñar unha liga de fútbol ou organizar un banquete de voda do xeito máis eficiente e divertido.
A Semana da Educación rematará o xoves 10 de febreiro ás 19.00 horas con Julio Basulto e a súa charla ‘Educar dende a mesa’. Dietista-nutricionista, docente e autor de varios libros sobre nutrición, Basulto chegará ao auditorio de Goián para falar de como compartir a mesa con fillas e fillos é moi importante para mellorar a súa saúde. Para o experto este momento e “moito máis do que acostumamos a crer”, e na súa conferencia detallará os múltiples beneficios que exerce comer coa nosa prole sobre a súa saúde física e emocional, e compartirá estratexias para que ese momento se converta nun espazo de aprendizaxe e, sobre todo, amor.
