14.6 C
Pontevedra
Domingo, 25 de Febreiro de 2024
Máis
    HomeBaixo MiñoOiaO Concello de Oia porá en marcha unha 'Aula Mentor' de formación...

    O Concello de Oia porá en marcha unha ‘Aula Mentor’ de formación online no espazo de novas tecnoloxías

    A iniciativa permitirá acceder a un extenso catálogo de cursos con titorías personalizadas

    O Concello de Oia porá en marcha unha “Aula Mentor” nas instalacións da aula de novas tecnoloxías que se está a crear na antiga biblioteca, situada nos baixos do consistorio. A través desta iniciativa a veciñanza poderá beneficiarse dun amplo catálogo de cursos online: formación non regrada, flexible e con titorías personalizadas.

    A aula créase a través dunha subvención de 4.000 euros concedida polo Ministerio de Educación e Formación Profesional (axudas da Secretaría Xeral de Formación Profesional dirixidas a entidades locais territoriais para a creación de aulas de formación aberta, flexible e a distancia mediante tecnoloxías da información e a comunicación a través de Aula Mentor 2021).

    Ambas as dúas administracións teñen xa asinado o convenio para o desenvolvemento deste programa que, a través da formación online, busca mellorar as posibilidades de empregabilidade. A aula estará operativa nas próximas semanas, de xeito que as persoas interesadas en realizar algunha formación poderán matricularse nos cursos e comezar coa formación online titorizada empregando o equipamento informático da aula ou ben desde a súa casa.

    Os cursos teñen un custe de 24 euros mensuais e, coa súa superación, obtense un certificado de aproveitamento asinado polo Ministerio de Educación e Formación Profesional. Así, o sistema de “Aula Mentor” permite acumular e capitalizar aprendizaxes que son susceptibles de recoñecemento na educación regrada a través dos procedementos de avaliación e acreditación de competencias.

    Para acceder a toda a información sobre o proxecto e máis ao catálogo de cursos o Concello vén de crear un espazo específico na web municipal. Está accesible na seguinte ligazón: https://www.concellodeoia.es/aula-mentor/

    LIBROS

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.

    Fran Fernández Davila, «Groenlandia»

    A Fran Fernández Davila gústalle sorprender cos seus traballos literarios, descolocar ao lector para levalo por paisaxes pouco transitadas física e emocionalmente, escapar da rutina diaria e, cunha forte carga de imaxinación, argallar historias nas que a intriga e o humor acaban por se converter en personaxes convidadas da trama.