O pleno do Concello da Guarda procedeu no día de onte, 22 de febreiro do 2021, á aprobación da modificación do contrato coa concesionaria da Piscina Municipal, este acordo contou coa aprobación de tódolos grupos municipais. O Concello da Guarda pasa a afrontar os gastos orixinados polo protocolo Covid na Piscina Municipal, así como asumir o canón do 13% en consumos enerxéticos (ata de agora estes gastos os asumía a concesionaria da Piscina Municipal).
O Concello colabora coa concesionaria da Piscina Municipal a través desta modificación contractual que se realiza no marco da necesidade de adoptar medidas urxentes e extraordinarias para facer fronte ao impacto económico da Covid-19 e garantir a continuidade do servizo ante a dificultade para o concesionario da execución do contrato.
Por outra banda, o concello ven mantendo reunións coa empresa concesionaria, que xa trasladou a negativa de ampliación do contrato por un prazo de 2 anos, proposta que lle trasladou o concello da Guarda para paliar as consecuencias negativas froito do COVID 19.
Como resultado deses encontros, o pasado 2 de febreiro acordouse que era unha prioridade acometer unha diagnose enerxética da Piscina e así se formalizou o contrato o 9 do mesmo mes, no que ademais dunha auditoría enerxética tamén se vai a realizar unha avaliación da propia estrutura arquitectónica. Destas cuestións son coñecedores todos os grupos municipais.
