13.9 C
Pontevedra
Sábado, 22 de Xuño de 2024
Máis
    HomeBaixo MiñoA GuardaO BNG abandona o Goberno da Guarda

    O BNG abandona o Goberno da Guarda

    Os concelleiros e concelleiras do BNG con dedicación renuncian ao seu salario e piden a baixa na Seguridade Social no Concello ao constatar "a intención do alcalde socialista de seguir interferindo nas nosas competencias”

    O Grupo Municipal do BNG na Guarda fixo público un comunicado no que cualifican de “irresponsabilidade” a actitude do alcalde, o socialista Antonio Lomba, “tras seguir interferindo de forma clara nas áreas de competencia exclusiva dos nacionalistas”. Tras a reunión mantida coa Comisión de Seguimento do pacto de goberno convocada polo BNG, os concelleiros do grupo aseguran ter constatado “unha vez máis que o alcalde non vai cesar na súa actitude nin na súa intención de seguir interferindo nas nosas competencias”.

    Nun comunicado enviado aos medios de comunicación, o BNG lembra que nas últimas eleccións municipais “a veciñanza da Guarda votou un cambio de rumbo que se traduciu na entrada do BNG no goberno municipal con cinco concelleiros” e aseguran os nacionalistas que asumiron ese reto “dende o primeiro día cunha actitude positiva e colaborativa”.

    O portavoz nacionalista, Anxo Baz, asegurou que nese período de tempo os concelleiros e concelleiras nacionalistas “fixeron todo o posible por levar adiante o pacto de goberno, pacto que ante as inxerencias do alcalde non é viable”. O BNG asegura que “non chegou aquí para ser cómplice das políticas continuístas levadas a cabo, por iso solicitamos a baixa na Seguridade Social e renunciamos ao salario, así como ás funcións de Goberno”.

    Para o portavoz nacionalista, Anxo Baz, “as políticas que desenvolve o PSOE prexudican gravemente á veciñanza da Guarda porque impiden levar adiante o proxecto posto en marcha polo BNG, un proxecto que busca investir en calidade de vida e en benestar social e que ten como eixo central desenvolver espazos que contribúan a atoparse a un mesmo e a relacionarse coa contorna natural e humana. En definitiva, dar pasos cara adiante para situar A Guarda no modelo de concellos que apostan sen titubeos polo futuro”.

    Anxo Baz quixo destacar que, pese a situación, “non renunciamos a seguir traballando por un modelo de futuro para A Guarda que, antes ou despois, estamos convencidos de que vai a chegar”.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.