O Monte Santa Tegra, segundo lugar máis visitado de Galicia, tras a Catedral de Santiago, era este mediodía o escenario da presentación da 15K do Atlántico Banco Mediolanum.
Tanto o día, como as espectaculares vistas, convidaban a prepararse para a carreira que se vai a celebrar este domingo 1 de outubro.
Abría o acto o alcalde da Guarda, Roberto Carrero, que se estreaba na proba como recentemente elixido rexedor da vila mariñeira, dando “a benvida ao Monte Santa Tegra, este lugar idílico de Galicia, no que o Océano Atlántico, acariña as nosas augas ”. Estamos, dicía, “sumamente implicados neste evento que cumpre 10 anos, e que superará os 1.000 participantes”.
Tras el, o director da carreira, Serafín Martínez, da empresa NOKO 360, explicaba todas as novidades desta edición que chega xa á decena. Así, empezaba falando, do “aumento de participación, case un 30 % máis, alcanzando os mil, entre as dúas distancias e a andaina”. “Estamos a envorcarnos aínda máis por cumprir os 10 anos”, e mostrábase “supersatisfecho da acollida por parte dos atletas da carreira curta, de 7,5 km, demandada xa outros anos, aínda que non estou seguro que poida volver a habela nun futuro”.
A camiseta conmemorativa, “está a ser un éxito”, tendo que ampliar os pedidos debido “á gran demanda”.
Refiréndose ao padriño da proba, Álvaro Piñeiro, aseguraba que “temos a honra de contar cunha persoa moi especial para min como é Álvaro”. Lembremos que o ponteareán fora o seu director no club ciclista Xacobeo Galicia.
Para finalizar, convidaba a “todos os novos membros das corporacións dos Concellos do Rosal, e A Guarda a coñecer a carreira desde dentro, que vexan o ambiente que hai ese día, porque é un evento que temos que coidar, tentando cada ano, gañar, xa non en cantidade, senón sobre todo en calidade”.
A carreira como sempre terá a súa saída en Oia, e iso mencionaba a súa alcaldesa, Cristina Correa, que lembraba “o escenario único, como é o Monasteiro de Oia, con esa igrexa recentemente rehabilitada”, facendo unha ano máis, “unha aposta por Serafín, porque todos os anos ten un gran éxito”. En Oia, “segue crecendo a afección de runners, pero tamén doutro tipo de deportes”.
Outro dos que se estreaba no cargo era o concelleiro de deportes do Rosal, Jose Carlos Martínez Crespo, que se “comprometía a participar, polo menos na andaina”, ademais, engadía “dáse a circunstancia de que son rosaleiro, a miña casa materna está en Oia e eu traballo na Guarda”.
Se a 15K do Atlántico pode chegar á súa décima edición é, en gran medida, pola aposta do seu patrocinador privado, o Banco Mediolanum, representado por Ángeles Franco, Family Bancker, que lembraba o nacemento desta 15K “ tras unha carreira en Vigo, díxenlle a Sera que tiñamos que facer algo así na nosa zona porque el é do Rosal e eu da Guarda”.
Facía mención Ángeles, do carácter solidario da 15K a través do programa Mediolanum Aproxima, “ coñecemos Ong e o que fan, estando nesta ocasión dirixida á Asociación Española contra o Cancro”; “é un reto persoal, no que queremos recadar fondos para un proxecto dirixido a nenos en fase avanzada ou terminal cun diagnóstico de cancro”. En Mediolanum compramos camisetas da proba para regalar a doantes, 1 € de cada un dos participates da andaina doarase, tentando chegar aos 5.000 € de recadación, que van ser dobrados con outros 5.000 por parte do Banco Mediolanum”.
Finalmente, convidaba a todos a entrar en “O meu gran de Aréa 15K”, e realizar unha achega tan necesaria.
María Gómez, responsable de sustentabilidade en Vigo da Asociación Española contra o Cancro, afirmaba que “ grazas a iniciativaos como as do Banco Mediolanum, podemos seguir axudando a familias do Baixo Miño, e de toda a provincia, cos nosos servizos gratuítos, así como seguir investindo en investigación”
“O obxectivo a nivel nacional, é o de conseguir no 2030 un 70% de supervivencia. Estamos agora nun 50%. Lembraba que no primeiro semestre de 2023 levaban “ máis de 300 intervencións no Baixo Miño, polo que estamos moi contentas e comprometidas”.
Pechaba a xornada, o flamante padriño desta 10ª edición, o exciclista Álvaro Piñeiro, noutra época director deportivo de Sarafín Martínez, co desaparecido Xacobeo Galicia. Dicía o pontareano que lle “facía moita ilusión a chamada porque normalmente teño moitas invitacións, pero a eventos ciclistas, non a carreiras a pié”. Afirmaba ser “ bo coñecedor da zona “xa que paso moitas veces en bicicleta por este camiño da costa que ten cada vez máis xente”.
“Farei a andaiana, xa a que a miña idade non estou para correr”, finalizaba o Campión da Volta ciclista a España nos 80.
Antes das fotos de familia finais, as representantes do Banco Mediolanum fixeron entrega dun agasallo ao propio Álvaro Piñeiro en agradecemento á súa participación.
Lembramos que as inscricións finalizarán ás 23.59 horas de mañá miérrcores, podendo anotarse ata ese momento en https://www.deporticket.com/web-evento/8730-15k-do-atlantico-banco-mediolanum.
