O Concello da Guarda vén de anunciar o encargo da redacción dun anteproxecto de ancheamento da calzada da PO-552, –vía que circunvala o monte Santa Trega– e para dotala dunha senda peonil e un carril bici. O encargo do Concello guardés prodúcese, logo da “pasividade” da Consellería de Infraestruturas e Mobilidade, organismo ante o que a Alcaldía da Guarda fixo reiteradas xestións sen que houbera resposta.
O anteproxecto encargado polo Concello que preside Antonio Lomba, será remitiro á Consellería para esixir “a súa urxente execución”. O referido anteproxecto contempla unha actuación na totalidade da PO-552 que non conta con beirarrúas, tanto polo lado norte, Cruzada-Camposancos como no lado este Camposancos ata intersección PO-355 (que conduce á Pasaxe) consistente nun ancheamento da calzada de rodadura, a construción de beirarrúas e a dotación dun carril bici.
A PO-352 é sen dúbida algunha unha das principais arterias de comunicación da Guarda, basta dicir que é a única conexión entre o casco urbano da Guarda e a Parroquia de Camposancos, tanto polo Oeste como polo Este, alén de suliñar que conduce a todas as praias fluviais da nosa vila.
Con estas referencias resulta doado entender que o tráfico rodado que soporta, sobre todo en época estival, é moi considerable. Ao mesmo tempo, e dado que a paisaxe pola que discorre é moi fermosa, atrae a multitude de peóns que pasean por ela.
Sen embargo, a pesares da súa importancia e do tráfico que soporta, non reúne as mínimas condicións de seguridade viaria, os carrís non superan na maior parte do trazado os 2,50 metros de ancho e non conta con beirarrúas para unha mínima seguridade dos peóns.
Dende a alcaldía da Guarda, foron moitas as ocasións, unhas por carta e outras persoalmente, nas que se lle reclamou á Consellería de Infraestruturas e Mobilidade o ancheamento da calzada, a construción dunha senda peonil e un carril bici. Por citar as ultimas xestións:
- 7 de novembro de 2017: reunión do alcalde Antonio Lomba coa conselleira Ethel Vázquez en Santiago, compromiso da conselleira de redactar o proxecto.
- 26 de decembro de 2018: reunión do alcalde Antonio Lomba en Pontevedra co Director Territorial de Infraestruturas, resposta do Director, a senda pode entrar dentro dun paquete no ano 2019.
- 31 de decembro do 2019: carta do alcalde Antonio Lomba á conselleira solicitándolle unha nova entrevista, ata o momento sen contestación.