Como se fora preciso buscar algunha excusa para achegarse a un lugar fermoso como poucos, que é A Guarda, o Concello ofrece unha fin de semana chea de actividades para toda as idades nas que a música, as visitas guiadas e as exposicións, teñen un lugar destacado. Se a iso unímoslle unha feira de oportunidades, o plan xa está feito.
Hoxe xoves e durante toda a fin de semana, o Centro de Interpretación das Fortalezas no Castelo de Santa Cruz acolle a Exposición de maquetas e figuras de Praxíteles González. Nesta mostra expóñense varias maquetas deste artista rosaleiro, como a Ponte do Tamuxe, Igrexa de Santa Mariña do Rosal, Muíño Serradoiro e dúas vivendas rosaleiras, –todos eles elementos do Rosal– ademais das maquetas das Catedrais de Santiago e Notre Dame. Completa esta exposición unha selección das máis de 40 esculturas realizadas polo artista. Horario de visita de 11:00 h a 14:00 h e de 18:00 h a 21:00 h. Entrada: 1 € adultos e 0,5 € ata 14 anos inclusive.
Cómpre lembrar tamén que o Concello da Guarda, a través da Concellería de Turismo, ven de iniciar un programa de visitas guiadas polo casco urbano que se realizan todos os mércores e xoves ata o 15 de setembro. As visitas son de carácter gratuíto e non é preciso inscrición previa, tan só achegarse ás 12:00 h ao punto de encontro, que é a Oficina de Turismo da Praza do Reló. Dende a Praza do Reló o grupo sae para coñecer o patrimonio da Guarda, este xoves celebrábase ás 12 a visita singular da época moderna: «Castelo de Santa Cruz».
Venres 16 de agosto
O vindeiro venres día 16 de agosto a Praza de Avelino Vicente (As de Copas) acolle a segunda cita do «Música nas Prazas 2019» ás 22 horas, co concerto que ofrece o grupo Blues do País. Cuarto ano desta actividade promovida dende a Concellería de Cultura do Concello da Guarda e que este ano conta cun total de 3 concertos nas Prazas de San Queitano, Avelino Vicente e Os Seixiños.
Blues do País é un grupo formado por Bieitta James e Pepe King que interpretan música blues de clásicos como Sitting on the dock of the bay (Sentadiña no pantalán), I just want to make love to you (Mirarche o cu), Killing me softly (Matasme despacio) ou Mercedes Benz (Chimpín). Coa súa música amosan que é posible facer blues na lingua do país.
Na xornada deste venres continúan as visitas guiadas para coñecer o patrimonio do Monte Santa Trega, ás 11:30 h realizarase a visita guiada ao Castro de Santa Trega, que terá como punto de encontro a vivenda reconstruída do Castro de Santa Trega e que terá unha duración aproximada de 30 minutos.
Ás 12:30 h e ás 17:00 h terán lugar dúas novas visitas guiadas ao Monte Santa Trega, con punto de encontro no Museo Arqueolóxico (MASAT) e que terán unha duración aproximada de 90 minutos. Estas visitas guiadas son de carácter gratuíto e sen inscrición previa. Para grupos de máis de 10 persoas é obrigatorio facer unha reserva previa chamando ao teléfono 986 610 504.
A taxa de acceso ao Monte Santa Trega é de 1 € para adultos e 0,5 € para menores de 14 anos.
Sábado 17 de agosto
O sábado, o Concello guardés organiza unha visita do máis interesante. Será un percorrido guiado polas escavacións das Salinas do Seixal.
Esta visita guiada, que conta coa coordinación de Anabam, realizarase de xeito gratuíto o sábado día 17 de agosto con saída ás 10:45 h dende o Porto da Guarda, cun percorrido aproximado de 2 horas empregando a senda litoral.
O Concello da Guarda quixo agradecer “a dedicación e entusiasmo mostrado polo numeroso equipo de arqueólogos e alumnos en prácticas de diversas universidades de Coimbra, Vigo e Santiago que fixeron posible que, nun curto espazo de tempo, A Guarda poda coñecer un pouco mellor o seu pasado romano”. Inscricións no teléfono 616 180 557.
Tamén na xornada deste sábado a Asociación de Empresarios da Guarda Acigu CCA, organiza ao longo do día na Praza de Avelino Vicente unha Feira de Oportunidades na que o comercio local ofertará importantes descontos e promocións para todos os asistentes. En caso de choiva o evento aprazarase a unha nova data que se anunciará convenientemente.
Tamén sábado continúan as visitas guiadas para coñecer o patrimonio do Monte Santa Trega, ás 11:30 h realizarase a visita guiada ao Castro de Santa Trega, que terá como punto de encontro a vivenda reconstruída do Castro de Santa Trega e que terá unha duración aproximada de 30 minutos.
Domingo 18 de agosto
A Casa dos Alonsos acolle este domingo a Inauguración da Exposición Arquitectura en Porispan, do artista Ramón González González. A Inauguración terá lugar ás 20:00 h e o horario de visitas da mesma será de mañá de 9:00 h a 14:00 h e de tarde de 19:00 h a 21:00 h. Os días festivos de 19:00 h a 21:00 h.
