O alcalde da Cañiza, Luis Piña, presentou esta mañá a segunda iniciativa para reactivar o comercio local neste Nadal e que, ademais, leva asociado ocio e lecer para os máis pequenos. Durante os días 28, 29 e 30 de decembro o Concello instalará na Praza Maior un mini parque de atraccións infantil cunha barca, noria e carrusel. O prezo de cada atracción é de 3 € por persoa pero a compra en calquera dos establecementos da Cañiza adheridos a este programa, dará dereito a un ticket desconto de 2,00 € que poderase presentar no acceso a cada atracción, costando finalmente 1,00€ por neno.
O parque de atraccións estará aberto en horario de 11:30 h a 14:00 h e de 16:00 h a 19:30 h na Praza Maior. En caso de choiva se suspenderá ata a melloría do tempo nesas datas.
Na mesma liña da campaña «A Confianza de sempre, Agasállate este Nadal», presentada o pasado 30 de novembro polo alcalde e a directiva da Asociación de Comerciantes da Cañiza, esta nova iniciativa ofrece tamén pola compra nun establecemento local descontos de 2 euros para as atraccións infantis.
Todo co obxectivo principal de dinamizar e incentivar o pequeno e mediano comercio da Cañiza. Como xa manifestara o Alcalde Luis Piña “unha aposta polo comercio local, polo comercio de sempre, cercano e comprometido”.