O alcalde da Cañiza, Luís Piña, xunto cos concelleiros e concelleiras do Goberno municipal, inauguraron a mostra A Cañiza xogando en cor, unha orixinal idea formada por dez Cubos de Rubik e 6 dados de cores, dun tamaño de 1’25 metros cúbicos feitos por persoal do concello durante o inverno, aproveitando e reciclando os materiais de transporte das novas luces led de Valeixe.
A Cañiza xogando en cor é unha boa mostra de arte efémera, reutilización, reciclaxe, e, por suposto, traballo desinteresado do persoal do concello nos peores días do inverno. O desembolso económico para levar adiante esta interesante idea foi mínimo: un total de 160 euros ou, traducido, 10 euros por cubo.
Agora, esa mostra de inxenio transformado en arte, estará durante esta quincena de agosto (dende o pasado día o 5 ata o domingo 22) en lugares destacados da vila.
Luís Piña, os concelleiros e concelleiras do grupo de Goberno e o persoal do Concello, aproveitaron a posta en marcha desta idea para facer un chamamento sobre “a necesidade de incrementar a reciclaxe e a reutilización de obxectos e materiais. Será positivo para o medio ambiente, para a economía e para todos nós”.
Cada peza, de 1’25 metros cúbicos, pesa 12 quilogramos.
