O Condado

O Consello escolar, a dirección do centro, a ANPA, o Concello e o alumnado do IES Pazo da Mercé de As Neves denuncian que, logo dun mes de clase, a Consellaría de Educación segue sen lles dar solución a graves problemas que afectan directamente tanto á calidade do ensino coma á seguridade.

A Concellería de Mocidade e Voluntariado, que dirixe Miguel Bouzó, convoca unha nova acción de compromiso medioambiental enmarcada dentro da iniciativa “Venres polo planeta”. Toda a mocidade e todo aquel e aquela que o desexe, poderá colaborar na limpeza do monte e das sendas da parroquia de Prado este venres día 9 de outubro.

O Grupo Ecoloxista ADENCO trasladou esta mañá os seus parabéns ao Concello de Ponteareas pola recuperación da Ponte de San Roque, que sufriu un atentado patrimonial no ano 2013. Desde entón, os ecoloxistas demandaron a recuperación da peza do baluarte da ponte que caeu ao río, e que agora se repuxo.

Dende principios desta semana, estudantes en prácticas ou que obtiveron o seu título recentemente comezaron a traballar nas instalacións do Concello. Coa financiación da Deputación de Pontevedra e a través do 'Plan O Teu Primeiro Emprego', unha Traballadora Social e un Enxeñeiro Técnico Agrícola iniciaron cadanseu contrato cunha duración de seis meses, prorrogables ata un ano.

Financiado integramente cos fondos de compensación ambiental, por un valor de 14.541,65 €, vén de acometerse a obra no cadro do barrio da Moreira, na parroquia de Taboexa. Os traballos consisten no cambio do cadro de mando e de 29 puntos de luz. As características das novas luminarias de corpo de aluminio son unha potencia de 31,1 Watios e 3000 Kelvin de temperatura ou color.

A Asociación Ponteareá CORPUS AS MONXAS, participa hoxe na tradicional oitava de San Miguel, patrón da vila do Tea, dunha forma virtual. Este proxecto organizado pola Oitava Noite de Uriangato, (México) patrimonio inmaterial do mundo, realizase hoxe, día 6 de outubro, coa participación de alfombristas de todo o mundo e grazas á colaboración da Coordinadora internacional de Entidades de alfombristas de Arte Efémera.

A concellaría de Ensino que dirixe a tenenta de alcalde Cristina Fernández Davila, anima a cidadanía a asistir á entrega de premios do concurso Debuxa o TEuA organizado pola asociación 'Familias Azuis', co apoio da Xunta de Galicia, para promover o coñecemento e a concienciación sobre o autismo.

O Pleno Ordinario da Corporación Municipal de Ponteareas vén de aprobar, cos únicos votos en contra do PP, unha iniciativa do BNG na que se reclama a tramitación urxente e extraordinaria dun Decreto por parte do goberno español que contemple fondos para que os Concellos poidan afrontar a crise sanitaria, social e económica derivada da COVID-19. Ademais, a iniciativa do Bloque solicita a derrogación da Lei 2/2012 de estabilidade orzamentaria e sustentabilidade financeira, “para permitir ás entidades locais atender as competencias propias con cargo aos remanentes e superávit”

A Asociación Forestal de Galicia (AFG) está desenvolvendo este outono un amplo programa de formación en toda a comunidade orientado a mellorar a silvicultura. Un dos próximos cursos abordará a certificación forestal, un sistema que garante a xestión sostible do monte e que é cada vez máis demandado no mercado.

Óscar Ibáñez & Tribo ofrecerán o vindeiro domingo, día 11 ás 19:30 horas no parque da Feira Vella, un concerto enmarcado no Concurso de Gaitas e que foi adiado por mor da meteoroloxía adversa. A entrada é gratuíta e brindará ao espectador a ocasión única de gozar dun dos máis afamados e recoñecidos compositores galegos.

A concelleira de Benestar Social, Verónica Carrera, informa da apertura do prazo de inscrición da ludoteca para este curso 2020-2021. Mañá día 6 e o mércores día 7 de 09:30 a 14:00 horas e de 17:00 a 20:00 horas as familias poderán inscribirse neste servizo municipal que organizará o curso en grupos e horarios en función da demanda para axudar nunha mellor conciliación laboral e familiar.

A celebración este ano da XV Festa do Tinto Rías Baixas, en As Neves, non seguirá o formato dos anos pasados. A situación creada pola Covid-19 fixo necesario adaptar a súa forma a esta nova realidade. A xa tradicional festa deixará paso, o vindeiro luns, 12 de outubro, a un acto de promoción deste produto nas instalacións da carpa do Hotel Nande, entre as 12:00 e as 15:00 h.