O Concello de Ponteareas entregou os Premios ‘Ponteareas, Lingua e Empresa’, relativos ao 2020, na Gala da Lingua de homenaxe á escritora Xela Arias Castaño. A través destes galardóns o Consistorio quixo recoñecer o labor de persoas e empresas que, día a día, achegan a lingua, dun xeito normal, aos consumidores e consumidoras e contribúen, deste xeito, ao aumento e mellora do uso social do galego no sector empresarial.
Os premios –unha obra do escultor ponteareán Silverio Rivas e un diploma acreditativo– recaeron en Guillermo Rodríguez Fernández, na categoría de Traxectoria do uso da lingua ao longo de décadas, empresario e xornalista que foi quen de fundar e dirixir empresas editoriais radicadas en Ponteareas e que sacou á rúa A Peneira, un dos poucos xornais en papel escrito integramente en galego que se mantivo en circulación durante varias décadas.
Foncalgás Xinzo SL, empresa de fontanaría e enerxías renovábeis, mereceu o galardón na categoría de Uso continuado da lingua galega, polo uso do galego como lingua de comunicación e publicidade da empresa, tanto a través do seu sitio web como das redes sociais, ou campañas publicitarias en calquera soporte.
Finalmente, Galician Brew SL, empresa produtora e comercializadora de cervexas, foi galardoada na categoría de Incorporación recente ao uso da lingua galega, pola contribución á visibilización da lingua galega na publicidade e etiquetaxe das súas marcas comerciais que chega aos consumidores e consumidoras en galego como sinal de identidade e garantía de orixe.
A alcaldesa, Cristina Fdez. Davila, o concelleiro de Lingua, Fernando Groba, e a concelleira de Promoción Económica, Eva Gil, felicitaron e destacaron a importancia de desenvolveren a súa actividade no idioma propio do país e de se converteren nos seus axentes dinamizadores e normalizadores. “Estes premios veñen visualizar e recoñecer aquelas empresas e aquelas persoas empresarias que usan e prestixian co seu uso o noso idioma no seu labor diario” indica o edil de Lingua.