O Grupo Municipal de EU-Son no Porriño deu conta da presentación dunha moción encamiñada a que o Concello do Porriño inste á Xunta de Galicia, concretamente á Consellería de Medio Ambiente, Territorio e Vivenda, ao deseño e execución dun Plan de Vixilancia Ambiental sobre a actividade mineira na parroquia de Budiño artellando, de ser o caso, os cambios normativos precisos para acadalo.
O plan, segundo a moción da formación asemblearia, debe ter como obxectivo fundamental “non só verificar o cumprimento dos condicionamentos establecidos nas concesións de explotación e de restauración senón tamén a súa suficiencia”. Nesa liña, EU lembra que “veciñas e veciños de Budiño, dos barrios Vitureira e Vacaría, seguen a padecer ruídos, pó, desprendementos e fendas nas edificacións”.
Esquerda Unida sinala que unha vez reunidos con representantes das empresas “para procurar un compromiso de valoración dos danos nas vivendas polas vibracións”, estas aseguran “que as medicións realizadas cos sismógrafos son aceptables”, delegando o control do ruído ao Concello de O Porriño.
Outro motivo de queixa, e non só da veciñanza, é o relativo ás augas ao constar, asegura EU, “probas gráficas da contaminación dos regatos”. Con respecto a ese problema, Esquerda Unida lembra que acaba de ser admitida una petición de Ecoloxistas en Acción ante a Comisión de peticións do Parlamento Europeo nº 1472/2020 “para que se investigue ás concesións Eidos, Forna, e Benedicta sitas en O Porriño, que presuntamente contaminan regatos que desembocan no río Louro e que afectan á ZEC Gándaras de Budiño (Rede Natura 2000), e que tras a investigación se leve a cabo unha avaliación de impacto ambiental”.
Para EU, que a veciñanza sexa escoitada e as súas peticións antendidas, “é unha cuestión de xustiza” polo que, ao seu entender, o Concello “debe liderar a reparación da débeda histórica con Atios e Budiño, parroquias afectadas”. No caso de Budiño, “o primeiro e máis urxente paso, aínda nun tema que non é materia municipal, ha de ser apelar á administración competente, dotada das ferramentas necesarias, para que faga uso delas ante esta situación”, conclúe EU.