14.7 C
Pontevedra
Domingo, 5 de Febreiro de 2023
Máis
    HomeÉ Noticia«Terra» a primeira das catro crías recuperadas no CAAN logo de ser...

    «Terra» a primeira das catro crías recuperadas no CAAN logo de ser arroxadas nun colector de lixo, xa ten fogar

    ‘Terra’, unha das cadelas da camada de catro cachorros que o Centro de Acollida e Protección de Animais (CAAN) conseguiu salvar despois de que foran arroxados en novembro a un colector en Vilanova de Arousa, xa ten un novo fogar. A pequena cadela foi adoptada o sábado día 11, só 24 horas despois de que a presidenta da Deputación, Carmela Silva, recordara a súa historia e recuperación na comparecencia para facer balance anual do centro, na que estivo acompañada das catro crías.

    Como sinalara Silva, tanto “Terra”, como “Sabela”, “Ceo” e “Ares”, xa estaban preparados para saír en adopción. E non fixo falta esperar máis dun día para que a primeira atopase un novo fogar no concello da Estrada, grazas á mediación da Asociación Palleiráns. Amais, o CAAN tamén recibiu outra petición para adoptar a “Sabela”, que probablemente se resolverá esta mesma semana.

    Hai que lembrar que estes catro cachorros ingresaron no centro en condicións moi críticas o pasado 30 de novembro. A Guarda Civil de Caldas localizara un total de cinco animais (dous machos e tres femias) no interior dun colector no lugar do Monte, na parroquia de Deiro (Vilanova), con apenas horas de vida, e os trasladou ao CAAN. Unha das cadelas chegou sen vida ao centro e o resto atopábanse con hipotermia e moi débiles. Os veterinarios do CAAN conseguiron estabilizalos e alimentáronos con biberón. Neste senso, trasladaban de noite aos cachorros ao seu propio domicilio para alimentalos cada dúas ou tres horas.

    Case mes e medio despois, os cachorros están en perfectas condicións e xa saíron en adopción, como amosou Silva a pasada semana na presentación dos “extraordinarios” resultados do centro no 2019. Así, ao longo do pasado ano foron 466 as adopcións acadadas, o que constitúe o récord anual desde que abriu o centro no 2013 e que estaba nas 430 logradas no 2016.

    Amais, reduciuse o número de recollidas, cun total de 1.290 fronte ás 1.788 que se fixeron no 2018. Hai que salientar tamén os resultados da recente campaña de sensibilización para fomentar as adopcións e a tenza responsable de animais. Neste senso, “Esteriliza, adopta”, acadou entre o 27 de novembro e o 9 de xaneiro un total de 48 adopcións. Outros 350 cans e cadelas esperan agora no CAAN atopar un novo fogar e, deles, “Apro” é o que máis leva no centro, cinco anos.

    COLABORACIÓNS

    Antía Otero, «Barroco»

    É posible que todo viñese suxerido polo título do novo poemario de Antía Otero, «Barroco», pero ao mergullarme nas súas páxinas vivín a sensación de pasear por unha galería de arte na que cada un dos poemas era, en realidade, un cadro ou unha peza escultórica que a autora describía con detalle.

    Ponteareas e a filla pródiga: o novo espectáculo do Circo da Dereita

    Aínda que o pareza, non é un déjà vu, non. É real como a vida mesma. A dereita en Ponteareas regresa ao seu pasado, non sabemos se por convicción nostálxica ou, como parece máis evidente, por non atopar nada mellor que ofrecer. Se cadra, en realidade non hai tal regreso a un pasado que esa dereita nunca abandonou, por máis que durante os últimos anos algúns quixeran convencer a Ponteareas, pleno tras pleno e eleccións tras eleccións, de que aquel negro pasado nada tiña que ver con eles nin cun Partido Popular que, reescribindo a nosa historia política, tería nacido en 1998 coa chegada a Ponteareas dun Salvador chamado para redimir, como novo candidato popular, os imperdonabeis pecados orixinais da dereita ponteareán encarnada até ese momento por un alcalde orgulloso do seu pasado franquista.

    María Solar, «A culpa»

    A metade de camiño entre a novela negra e o thriller, María Solar vén de presentar un novo traballo para adultos no que pescuda nas interioridades da parte máis escura da alma humana a través dun trío de mulleres, protagonistas do relato.

    Antón Riveiro Coello, «Días de intemperie»

    A nova achega de Antón Riveiro Coello, «Días de imtemperie», é unha proposta que contén nove relatos de temática e transfondo diferentes, mais que teñen un elemento en común, como é a guerra no sentido máis amplo da palabra.

    Colaboradores

    Alberto Aliaga Sola
    20 POSTS0 COMMENTS
    Bea Sanfa
    14 POSTS0 COMMENTS
    Manrique Fernández
    78 POSTS0 COMMENTS
    Paz de la Peña
    41 POSTS0 COMMENTS
    Ricardo Canosa Bastos
    14 POSTS0 COMMENTS
    Roberto Mera
    6 POSTS0 COMMENTS
    Avatar
    1 POSTS0 COMMENTS