A Deputación de Pontevedra, a través de SmartPeme, oferta esta próxima semana catro novas accións formativas impartidas de xeito online, enmarcadas na carteira de obradoiros que se imparten de forma telemática. As accións versan sobre o perigo de sufrir un ciberataque, novas ferramentas de Instagram para o turismo, como deseñar unha estratexia de email márketing e axustes de impresoras 3D.
En concreto, este luns 1 impartirase o obradoiro Covid e ciberseguridade en 2021, a cargo de Manuel Freire, experto universitario en Robótica. O martes 2 será a quenda de Novas ferramentas de Instagram para turismo, que será impartido por Mariana Rosa, graduada en Turismo.
Pola súa banda, o mércores 3, a posgraduada en Comunicación e Industrias Creativas Fátima Faílde, impartirá Desenvolve a túa propia estratexia de email márketing e, o xoves 4, contaremos de novo coa participación de Manuel Freire, que dará continuidade aos anteriores obradoiros sobre impresoras 3D en Impresión 3D VIII – Axustes de impresora.
