A Deputación de Pontevedra, a través de SmartPeme, oferta esta semana catro novas accións formativas impartidas de xeito online, enmarcadas na carteira de obradoiros que se imparten de forma telemática. As accións versan sobre como crear anuncios de aloxamentos en Airbnb, com crear unha tenda en liña con Prestashop e como debuxar con Onshape.
En concreto, este martes 15 impartirase o obradoiro “Como crear anuncios de aloxamentos en Airbnb”, estarán a cargo de Carla Moreno, unha das market manager dos aloxamentos Airbnb en España e Portugal, quen falará de cara ás empresas, emprendedores e autónomos do sector turístico, e lles contará as tendencias de viaxe globais e locais.
O mércores 16, seguindo o fío condutor do obradoiro anterior, Federica Petruccio, falará de “Como crear anuncios de experiencias en Airbnb”, obradoiro orientado ás empresas do sector turístico e recreativo. Xa pola tarde, Guillermo Nass, Deseñador Gráfico Publicitario, impartirá “Crea a túa tenda en liña con Prestashop I: E-Commerce e tenda en liña”, onde desvelará as posibilidades desta ferramenta de xestión de contidos para o comercio electrónico, Pymes e grandes corporacións. Para finalizar a semana, o xoves 17, será a quenda de “Debuxo con Onshape, PartSudio V” a cargo Manuel Freire, experto universitario en Robótica e Impresión 3D, quen falará da potencialidade desta ferramenta como ven facendo en anteriores obradoiros.